Жанна Літвіна пра зварот у МЗС Польшчы: «У дэмакратычных палітыкаў адсутнічае ясная пазіцыя"

На думку спн. Літвіной, адной з асноўных праблем сёння з’яўляецца адсутнасць у палітыкаў яснай пазіцыі ў дачыненні да сродкаў масавай інфармацыі. Па назіраннях старшыні БАЖ, непаслядоўнасць і недальнабачнасць у дачыненнях з прэсай палітыкі праяўлялі напрацягу апошніх 10 гадоў, пакідаючы адным з асноўных патрабаванняў доступ да дзяржаўных СМІ і «забываючыся» на праблемы недзяржаўнай прэсы. 

«У згаданым лісце яскрава прасочваецца імкненне загнаць недзяржаўную прэсу „ў сферу абслугоўвання“ — гэтак жа, як робіць сённяшняя ўлада. Між тым, калі прэса трапляе ў складаную сітуацыю — як пасля ператрусаў у канцы сакавіка, — журналісты застаюцца сам-насам са сваімі праблемамі», — заўважае Жанна Літвіна. 

Старшыня БАЖ лічыць, што вяшчанне дзвюх замежных радыёстанцый у  FM-дыяпазоне не вырашыць праблемы свабоднага абарачэння інфармацыі на тэрыторыі Беларусі: «Я гэтую ідэю чую ўжо напрацягу 10-і гадоў — пра тое, што перадатчыкі павінныя быць устаноўленыя на мяжы з заходнімі краінамі. Але існуюць аб’ектыўныя прычыны, па якіх сігнал не можа распаўсюджвацца і рэтранслявацца на ўсёй тэрыторыі Беларусі. Таму чакаць, што гэтыя дзве радыёстанцыі вырашаць усе нашыя глыбінныя праблемы, не варта». 

На думку Жанна Літвіной, у грамадстве наспела патрэба шырокай дыскусіі на тэму дачыненняў палітыкаў і журналістаў. «Мы разлічваем на тое, што такая дыскусія распачнецца найбліжэйшым часам», — кажа старшыня БАЖ. 

Першым пра ліст да польскага МЗС паведаміў сайт «Маладога фронту», але у паведамленні цытаваліся толькі асобныя фрагменты тэксту і не было звестак пра падпісантаў звароту. Між тым, як вынікае з поўнага тэксту ліста, што сёння змясціла на сваім сайце Радыё Рацыя, пад зваротам паставілі свае подпісы тры чалавекі: старшыня «Маладога фронту» Зміцер Дашкевіч, намеснік старшыні Партыі БНФ Алесь Міхалевіч і намеснік старшыні Беларускай сацыял-дэмакратычнай партыі Грамада» Ігар Рынкевіч.

У лісце гаварылася пра інфармацыйную ізаляцыю Беларусі, «нулявы» эфект ад працы замежных радыёстанцый, што вяшчаюць на Беларусь, — у прыватнасці, «Еўрарадыё» і «Рацыя», — а таксама крытыкаваўся прафесійны ўзровень супрацоўнікаў некаторых з іх. Аўтары ліста прапаноўвалі стварыць «Назіральны савет для перыядычнага маніторынгу электронных СМІ, што дэкларуюць сваю прыхільнасць да дэмакратыі і правоў чалавека» і наладзіць «сапраўднае FМ-радыёвяшчанне"на тэрыторыю Беларусі. Акрамя таго, „для эфектыўнай працы медыяў“ аўтары ліста «лічаць лагічным, каб пасады асобаў, адказных за эфір…займалі грамадзяне Беларусі, што добра арыентуюцца ў беларускіх справах дый маюць досвед працы на  FМ-станцыях».