Беларускія пытаньні закранае "Gazeta Wyborcza"

"Gazeta Wyborcza" піша таксама – у чарговы раз – пра цану візаў для грамадзян усходніх суседзяў Польшчы пасьля ўступленьня краіны ў Шэнгенскую зону. Віцэ-міністар замежных справаў Павал Коваль заверыў, што Польшча пастараецца захаваць ільготы для ўкраінцаў, якія цяпер атрымліваюць візы бясплатна. Звыш дзесяці катэгорыяў украінцаў атрымае права да бясплатных візаў. Гэтыя льготы ахопяць аж палову жыхароў Украіны. Падобнае пагадненьне палякі хацелі б падпісаць таксама зь беларусамі. Апроч гэтага, кіраўнік МЗС зможа звольніць грамадзян канкрэтных краін ад абавязку аплаты за візу. На думку Коваля, цана 75 эўра за гэтак званую нацыянальную візу будзе фігураваць вельмі рэдка. Нацыянальную візу атрымаюць асобы, якім патрэбная польская віза на больш працяглы час – напрыклад студэнты, людзі, якія маюць дазвол на працу ў Польшчы. Права на бясплатную нацыянальную візу ў Польшчу атрымаюць таксама ўладальнікі гэтак званай Карты паляка. Нацыянальная віза – гэта шлях, па якім Польшча можа абысьці абавязак увесьці дарагія візы для грамадзянаў Расеі, Беларусі ды Ўкраіны. У выпадку гэтых візаў магчыма будзе ўвесьці шматлікія льготы. Праўда, згодна з распараджэньнем Эўразьвязу, колькасьць нацыянальных візаў не павінна перавысіць 3% ад агульнай колькасьці. Але польскія дыпляматы неафіцыйна кажуць, што на практыцы іх можа быць больш. А 3% - гэта толькі ідэал, да якога павінны імкнуцца краіны Эўразьвязу. Напрыклад, Гішпанія выдае 22% нацыянальных візаў, Нямеччына – 8%, а Францыя – 6%.