«Белсат» здымае беларускіх музыкаў

Два кліпы за тры дні?

Каардынатар праекту з польскага боку Ігар Знык лічыць, што лічба, да якой імкнуўся “Белсат”, маларэальная:

“Белсат” меркаваў, што да канца году будзе зьнята 100 кліпаў ці каля таго. Але ад самага пачатку было зразумела, што гэтага ніхто ня здатны зрабіць. З другога боку, лепш імкнуцца да нерэальнага, чым паставіць нізкую рысу і толькі на ёй і спыніцца. Мы арыентуемся, што здымаем два кліпы на тыдзень. У сярэднім. Але ж здараюцца і тыдні, калі нічога не здымаем наагул”.

Схема гэткая: з гуртом дамаўляюцца, калі яны прыедуць у Варшаву, сустракаюць на вакзале, вязуць на здымкі, абмяркоўваюць сцэнар, здымаюць і разьвітваюцца. На ўсё – ня болей за 3 дні.

“Калі ў гурту ёсьць уласныя прапановы што да сцэнару, думкі, то ясна – усе адкрытыя да гэтага. А калі няма, то можа дапамагчы польскі бок фірмы”, – гаворыць Ігар Знык.

Варашкевіч: “Змантавалі на хуткую руку...”

Супярэчыць такім заявам Сяргей Скрыпнічэнка, лідэр гурту “Жыгімонт Ваза”, які ўжо зьняў два кліпы ў Варшаве:

“Зусім ня згодны з гэтым цьверджаньнем. Мы мелі свае 2 сцэнары на 2 кліпы, але нам у іх адмовілі. Прычым прапанавалі загадзя напісаныя сцэнары на нашыя песьні. Здымалася ўсё ўрэшце па польскіх сцэнарох, урэшце атрымалася ўсё значна горш, чым можна было. І не задаволеныя засталіся абодва бакі – і мы, і польскі бок”.

Лідэр гурту “Крама” Ігар Варашкевіч расчараваны супрацай яшчэ больш:

“Там была добрая фактура, але змантажавалі, як выглядае, на хуткую руку. Урэшце, я адзін раз гэта глядзеў, што атрымалася, – больш глядзець ня буду”.

"Плюсы: у нас не было кліпаў, а яны зьнялі..."

А вось лідэр гурту “IQ48” Аляксандар Ракавец цалкам задаволены творчай супрацай з польскім бокам:

“Ну, плюсы ў чым? У нас кліпаў няма, як іх зьняць – няма як. Дык вось паехалі, зьнялі за іх грошы кліпы. Вынік што – вынік станоўчы, я нават меншага чакаў. Мне спадабалася, што атрымалася... Гульня са сьвятлом, сьвятло ў цемры”.

Паводле беларускіх музыкаў, першапачаткова меркавалася зьняць каля тысячы кліпаў беларускіх выканаўцаў у супрацы з тэлеканалам “Белсат”. Разам з тым тэлеканал адмаўляецца прымаць да будучага эфіру ўжо зьнятыя за колькі гадоў кліпы беларускіх музыкантаў, аргумэнтуючы гэта іх недахопамі творчых ды тэхнічных вартасьцяў.