Адкрытая лекцыя Міхала Анемпадыстава "Уяўляючы Беларусь"

Немагчыма ўявіць, каб культура развівалася з нейкага аднаго элемента. Гэта заўсёды комплекс, нейкі корпус сімвалаў, знакаў, сэнсаў... Які развіваецца менавіта як сукупнасць і набывае сэнс у гэтай спалучанасці элементаў. Пры змене гістарычных эпох, пад уплывам сацыяльных катаклізмаў гэты корпус можа змяняца, ламацца, часам да непазнавальнасці — зразумела, кожны час растаўляе свае акцэнты.

"Рэстаўрацыя" культурных напластаванняў, пераасэнсаванне "мінулага" дае нам разуменне таго, што робіць набор розных элементаў адным цэлым альбо што перашкаджае цэльнасці культуры. Гэта ўзбагачае нас у вызначэнні "свайго", надае нам здольнасць бачыць абдбітак "сваёй культуры" ў самых "простых рэчах". Дазваляе зразумець, што дае культуры развіццё, а што робіць яе проста калекцыяй — няхай сабе ўдалай і каштоўнай — здабыткаў іншых культур.

28 кастрычніка, у сераду, Лятучы ўніверсітэт у межах серыі адкрытых лекцый "Галоўнае пытанне" запрашае на лекцыю дызайнера, паэта, перакладчыка Міхала Анемпадыстава "Уяўляючы Беларусь". Пачатак у 18.30.

У пошуках адказу на пытанне "Што такое беларуская культура?" лектар прапануе зрабіць наступныя акцэнты:

• Нацыя як "уяўленная" супольнасць на прыкладзе беларускага нацыяўтварэння;
• Уніфікаванае ўяўленне і актуалізацыя;
• Уяўленні айцоў-заснавальнікаў;
• Уяўленні беларускіх адраджэнцаў канца ХІХ — пач. ХХ стагоддзяў;
• Тутэйшасць і прасторавыя прэферэнцыі;
• Інбелкульт. Барацьба з нацыяналізмам. Савецкі і заходнебеларускі дыскурсы;
• Беларусь пад нямецкай акупацыяй;
• Пасляваенны супраціў і рэпрэсіі, адліга і стагнацыя;
• Адраджэнне 1980-90х;
• Незалежная Беларусь. Выбар і барацьба культурных мадэлей;
• Культура Беларусі і беларуская культура. Межы і дамінанты.

Увага! Усіх жадаючых наведаць лекцыю просім папярэдне зарэгістравацца. Інфармацыя пра месца правядзення будзе дасланая зарэгістраваным удзельнікам напярэдадні.

Расклад і тэмы лістападаўскіх лекцый глядзіце на сайце Лятучага ўніверсітэта: www.fly-uni.org.

UPD.: Відэазапіс адкрытай лекцыі:

Гл. таксама інтэрв'ю з Міхалам Анепадыставым напярэдадні лекцыі ды справаздачу аб адкрытай лекцыі