19-20 чэрвеня ў Мінску — "Права на спадчыну" і Дзяржаўны спіс гісторыка-культурных каштоўнасцей"

UPD. Увага! Даты правядзення канферэнцыі і тэрмін падачы заявак на ўдзел змяніліся!

19-20 чэрвеня 2020 года ў Мінску пройдзе навукова-практычная канферэнцыя "Права на спадчыну" і Дзяржаўны спіс гісторыка-культурных каштоўнасцей: выклікі і рашэнні", мэта якой — праўдзіва ацаніць патэнцыял гэтага інструмента. Разглядаецца магчымасць правядзення канферэнцыі ў анлайн-фармаце.

Грамадска-культурніцкія прафесіяналы, прадстаўнікі нацыянальных і мясцовых органаў улады, архітэктары, рэстаўратары і даследчыкі, што працуюць з тэмай і аб’ектамі беларускай спадчыны, маюць магчымасць даць рознабаковую ацэнку эфектыўнасці Дзяржаўнага спіса гісторыка-культурніцкіх каштоўнасцей. Гэты інструмент культурнай палітыкі, які шырока выкарыстоўваецца ў Еўропе і свеце ўжо больш за 150 год, у Беларусі з’яўляецца асноўным дакументам дзяржулiку аб’ектаў спадчыны і кіравання імі. Сёння спіс змяшчае амаль 5,5 тыс. нерухомых аб'ектаў спадчыны, і гэта лічба расце.

Спіс робіцца вызначальнай вехай для ўдзела грамадства ў вызначэнні лёса аб’ектаў спадчыны. На практыцы дыялог аб лёсе помніка далёка не заўсёды працякае актыўна, шырока і скаардынавана паміж органамі ўлады, грамадскай і экспертнай супольнасцямі.

Такая сітуацыя натхняе грамадскае аб'яднанне "Беларускі камітэт ІКАМОС" у партнёрстве з міжнароднай НДА "ЕўраБеларусь" абвесціць праядзенне навукова-практычнай канферэнцыі "Права на спадчыну" і Дзяржаўны спіс гісторыка-культурных каштоўнасцей: выклікі і рашэнні" 19-20 чэрвеня 2020 года ў Мінску (з магчымым пераносам альбо пераходам у анлайн-фармат).

Сцяпан Стурэйка, кіраўнік "ICOMOS-Беларусь", тлумачыць: "Мы заклікаем шматлікіх калег разам узяцца за некалькі задач. Па-першае, вывучыць характэрныя сітуацыі з захаваннем і аднаўленнем розных катэгорый нерухомай спадчыны, уключаных у Дзяржаўны спіс. Па-другое, важна падвышаць якасць адпаведнага дыялогу паміж дзяржаўнымі органамі, экспертамі, грамадскасцю ды ўласнікамі. Па выніках мы зможам вылучыць найлепшыя практыкі кіравання помнікамі і вызначыць перспектывы для рэфармавання ахоўнага і рэстаўрацыйнага заканадаўства ў Беларусі".

МНДА "ЕўраБеларусь", ужо некалькі год працуючы з беларускімі адмыслоўцамі ў галіне спадчыны, стала першым і важным стратэгічным партнёрам у гэтым кірунку. Таццяна Пашавалава, праграмны дырэктар арганізацыі, кажа: "Мы радыя аформіць нашыя высілкі ў агульны комплекс адукацыйных і камунікацыйных мерапрыемстваў, прысвечаных сацыяльным аспектам працы з помнікамі беларускай культуры. Паведамляць пра кожнае з іх мы плануем асобна і ў бліжэйшы час".

Праграма канферэнцыі будзе вызначацца цягам красавіка, аднак пул "гарачых" пытанняў ужо размеркаваны на тры напрамкі: 1) нацыянальны і 2) лакальны ўзроўні рэгулявання спадчыны, а таксама 3) праца з асобнымі катэгорыямі помнікаў.

Падаць заяўку на ўдзел у якасці выступоўцы можна праз форму на сайце канферэнцыі альбо даслаўшы тэкставы файл (у фармаце .doc ці .docx) да 1 чэрвеня 2020 года (уключна) на адрас электроннай пошты: [email protected] (з пазнакай: "Заяўка на ўдзел у канферэнцыі").

У заяўцы трэба абавязкова ўказаць:

1. Імя і прозвішча дакладчыка;
2. Месца працы або арганізацыю, якую прадстаўляе дакладчык, яго пасаду;
3. Адрас электроннай пошты і кантактны нумар тэлефона дакладчыка;
4. Назву даклада з пазначэннем прыарытэтнай секцыі (аргкамітэт мае права пераразмяркоўваць даклады па секцыях на ўласны погляд);
5. Кароткі змест даклада (200-300 словаў).

Умовы ўдзелу

Удзел у канферэнцыі бясплатны. Выбраныя даклады будуць апублікаваныя. Праезд і пражыванне ў Мінску адбудзецца за кошт удзельнікаў або арганізацый, якія яны прадстаўляюць. Аргкамітэт канферэнцыі пакідае за сабой права адхіляць заяўкі, адмаўляць аўтарам у публікацыі тэкстаў па прычыне неадпаведнасці тэматыкі ці нізкай акадэмічнай/тэхнічнай якасці прапанаванага матэрыяла. Рэгістрацыя на ўдзел у якасці гасцей адкрыецца пазней.

Крыніцы:

• Сайт канферэнцыі
• Дэтальны інфармацыйны ліст-запрашэнне

Даведка

Грамадскае аб’яднанне "Беларускі камітэт ІКАМОС" — арганізацыя, якая займаецца падтрыманнем і пасоўваннем тэорый, метадалогій і навуковых тэхналогій у кансервацыі архітэктурнай і археалагічнай спадчыны. Міжнародная рада па захаванні помнікаў і гістарычных мясцінаў ICOMOS была ўтворана ў жніўні 1965 года, у Беларусі камітэт прадстаўлены з 2002 года. У арганізацыі працуюць гісторыкі, архітэктары, археолагі, рэстаўратары, грамадскія актывісты, з’яднаныя праблемамі захавання і рэстаўрацыі гістарычных аб’ектаў Беларусі.

Міжнародная недзяржаўная арганізацыя "ЕўраБеларусь" была ўтворана ў 2009 годзе ў Літве і аб’яднала шэраг праўдстаўнікоў аналітычных, экалагічных і іншых грамадскіх арганізацый. Дзейнасць "ЕўраБеларусі" прысвечана стымуляванню і падтрымцы праеўрапейскага развіцця Беларусі як паўнапраўнага суб’екта еўрапейскіх зносін на разнастайных узроўнях.

"Права на спадчыну" — комплекс аб’яднаных мерапрыемстваў "Беларускага камітэта ІКАМОС" і "ЕўраБеларусі", прысвечаных выпрацоўцы актуальных мадэлей кіравання спадчынай прафесійнымі, лакальнымі і іншымі супольнасцямі.