У Беларусі 35,3 тысячы беспрацоўных, але 440 тысяч "дармаедаў"

Пры гэтым за снежань звольнілі з працы на 10 тыс. чалавек болей, чым прынялі. Колькасць звольненых перавышала колькасць прынятых на працу 10 з 12 месяцаў 2016 году. Калі скласці звесткі па ўсіх месяцах, атрымаецца, што звольнілі на 108,1 тыс. чалавек больш, чым прынялі на працу.

Пры гэтым колькасць "дармаедаў" на парадак большая: падатковыя органы накіравалі больш за 440 тыс. апавяшчэнняў пра неабходнасць сплаціць збор на фінансаванне дзяржаўных выдаткаў. Збор вядзецца за 2015 год, калі афіцыйная колькасць зарэгістраваных беспрацоўных называлася роўнай 43,3 тыс. чалавек.

У свеце колькасць беспрацоўных лічаць па хатніх гаспадарках, у Беларусі ж — па колькасці зарэгістраваных на біржы працы, тлумачыць "Радыё Свабода" эканаміст Леанід Заіка. Рэгістравацца на біржы хочуць далёка не ўсе, хто шукае працу, "гэта ўнікальныя людзі, якія ў нешта там вераць альбо хочуць атрымаць тыя 10 даляраў на месяц". Тыя, хто страцілі працу, могуць ехаць на сельскагаспадарчыя ці будаўнічыя работы за мяжу альбо проста сядзець без працы.

Пакуль "падатак на дармаедаў" сплацілі толькі 34 тыс. чалавек — у 13 разоў меней, чым было накіравана "лістоў шчасця". Тэрмін выплаты збору працягнулі, цяпер яго трэба сплаціць да 20 лютага.