Літва прыме закон аб забароне закупаў электрычнасці з небяспечных станцыяў

Літоўскі міністар замежных спраў Лінас Лінкявічус абмеркаваў гэта пытанні з дзяржаўным сакратаром канцылярыі прэзідэнта Польшчы Кшыштафам Шчэрскім. "Я нагадаў яму, што ў нас цяпер ствараецца такі закон, што калі аб’екты небяспечныя, то мы проста не купляем у іх прадукцыю", — сказаў ён.

Балтыйскія краіны дамовіліся адключыцца ад расійскага энергакальца БРЭЛЛ да 2025 году. Зараз Аб’яднаны цэнтар даследаванняў Еўракамісіі праводзіць даследаванне, якое павінна адказаць на пытанне, які варыянт сінхранізацыі для краінаў Балтыі аптымальны. Аналізуецца магчымасць сінхранізацыі электрасетак праз Польшчу, праз Фінляндыю альбо магчымасць для краінаў Балтыі працаваць у асобным сінхронным рэжыме, не далучаючыся да еўрапейскіх краінаў.

Міністар энергетыкі Літвы Жыгімонт Вайчунас сказаў, што рашэнне пра закон не купляць электраэнергію з небяспечных электрастанцыяў урад прыме на наступным тыдні. Мэта гэтага закону — спыніць будаўніцтва Беларускай АЭС у 50 кіламэтрах ад Вільні, у Астраўцы.

На наступным тыдні ў Беларусь прыбудзе місія МАГАТЭ па ацэнцы праектавання пляцоўкі АЭС з улікам вонкавых падзеяў, так званая місія SEED (Site and External Events Design Review Service). З 16 па 20 студзеня эксперты МАГАТЭ ацэняць з пункту гледжання міжнародных патрабаванняў бяспекі ўстойлівасць Астравецкай пляцоўкі, а таксама сістэмаў, структураў і кампанентаў АЭС. У тым ліку будзе ацэнены запас трываласьці, закладзены ў праекце з улікам постфукусімскага досведу, паведамляе "Радыё Свабода".