Эксперт: Сярэдні заробак у 500 долараў магчымы, але адзін раз

Наступствы ж гэтага будуць вельмі сумнымі для беларускай эканомікі, кажа вядомы эканаміст Сяргей Балыкін. Дастаткова ўключыць друкарскі грашовы станок.

– Магчыма накачаць эканоміку пустымі грашыма, выплаціць заробак, але ж расплатай за гэта будзе рост інфляцыі і наступная дэвальвацыя і памяншэнне заробкаў у параўнанні з тым, што было  раней, - сказаў Балыкін «Радыё Рацыя».

Эканаміст тлумачыць, што ж трэба зрабіць для сапраўднага росту прыбыткаў працоўных беларусаў.

– Каб рэальна падняўся заробак, трэба павялічваць попыт на працоўную сілу. А каб павялічваць попыт на працоўную сілу, трэба павялічваць попыт на беларускую прадукцыю на замежных рынках. Але ж дзяржаўныя прадпрыемствы ўжо не ў стане працаваць так эфектыўна, як нам хацелася б. Таму неабходна праводзіць рынкавыя рэформы.

Паводле Белстату, сярэдні заробак у Беларусі зніжаецца тры месяцы запар – калі ў верасні гэтага года ён складаў 370 еўра, то ў лістападзе – каля 350.