Фінансавы аналітык прагназуе рост еўра пасля сённяшняга падзення

Старшы фінансавы аналітык Альпары Вадзім Іосуб кажа, што з рублём у дачыненні да валютнага кошыка нічога не адбудзецца. На сённяшніх таргах на Беларускай валютна-фондавай біржы ён прадбачыў рост долара і адначасовае падзенне курса еўра. Далей гэтая тэндэнцыя працягвацца не будзе.

“Чакаць далейшага зніжэння еўра і фунта да долара я б не стаў. Хутчэй за ўсё пасля рэзкага падзення, яны узновяць свой кошт”, - сказаў аналітык Еўрарадыё.

Па словах Вадзіма Іосуба, беларусам прадаваць еўра і фунты ўжо позна. Але калі захоўваць свае зберажэнні ў розных валютах, на гэтым скачку людзі збольшага нічога не згубілі б, бо курс долара вырас, а курс еўра ўпаў.

Для беларусаў рэзкі рост долара будзе адчувацца толькі сёння, кажа аналітык, далей вынікі рэферэндума ўплываць на яго ўжо не будуць.