Беларуская чыгунка купіць новыя польскія цягнікі

«PESA Bydgoszcz» - польскі канцэрн, які спецыялізуецца ў вытворчасці рэйкавай тэхнікі, вырабіць для Беларускай чыгункі новыя дызэль-цягнікі.

Такія цягнікі ўжо возяць пасажыраў паміж Вільняй і Мінскам, і беларусы імі вельмі задаволеныя, паведамляе «Польскае радыё».

«Цяперашняя вытворчасць дызэль-цягнікоў 730М для БЧ - гэта працяг папярэдняга кантракту, хаця ўжо на падставе асобнага дагавора», - кажа прэс-сакратар быдгаскага вытворцы Міхал Жукоўскі.

Першы з дызэль-цягнікоў будзе дастаўлены беларускаму боку вясной 2016 году. Як і папярэднія, так і новыя цягнікі будуць абслугоўваць маршрут «Мінск- Вільня» прынамсі да часу электрыфікацыі гэтай лініі.

«У цяперашні час мы рэалізуем пагадненне на пастаўку чатырох цягнікоў у 2016 годзе й праўдападобна чарговых чатырох транспартных сродкаў у 2017 годзе», - дадаў прадстаўнік «PESA».

Нагадаем, першыя дызэль-цягнікі з Быдгашчы пачалі вазіць пасажыраў у Беларусі на пачатку мая 2014 году. Яны могуць развіваць хуткасць да 140 км/г.