Ці заробіць Беларусь на расійскіх санкцыях супраць Турцыі?

Расія ўвяла часовыя эканамічныя санкцыі супраць Турцыі пасля таго, як турэцкія ваенныя збілі расійскі самалёт СУ-24.

Акрамя таго, з 1 студзеня 2016 года расійскім працадаўцам забаронена прыцягваць на працу грамадзян Турцыі.

"Пакуль што можна казаць толькі пра тэарэтычныя магчымасці зарабіць на санкцыях. Але яны ёсць. Напрыклад, улічваючы, што ў Расіі будуць зварочваць працу турэцкіх будаўнічых кампаній (а яны, па некаторых падліках, выконваюць работы не менш, чым на 10 мільярдаў долараў), беларускаму боку можна гэтым скарыстацца і больш шырока адкрыць для туркаў браму ў Беларусь. Яны цудоўна паказалі сябе ў будаўніча-гатэльным бізнэсе. Таксама трэба прадаставіць магчымасць туркам пераарыентаваць іх экспарт садавіны, гародніны і мяса, якія ішлі ў Расію. Акрамя таго, не трэба забывацца, што беларускія бізнесмены навучыліся так званаму “цэдлівакаваму бізнесу”. Калі раней забароненая ў Расіі прадукцыя Еўразвязу ішла, да прыкладу, з турэцкімі сертыфікатамі, то зараз прыйдзецца ізноў пераарыентоўвацца. Ва ўсялякім разе, некаторыя нашы прадстаўнікі бізнеса добра навучыліся гэта рабіць. А можна яшчэ праводзіць у Беларусі невялікую перапрацоўку таго ж турэцкага мяса і на законных падставах рээкспартаваць прадукцыю ў Расію. Так што Беларусь можа знайсці сваё месца ў беларуска-турэцкім канфлікце", - мяркуе эканаміст Барыс Жаліба, якога цытуе Радыё Рацыя.

А да пагрозаў Масквы ўмацніць кантроль на мяжы трэба паставіцца сур'ёзна, кажа эканаміст:

"Расія зараз абазлілася ледзь не на ўвесь свет, і Беларусі ў гэтым шэрагу таксама дастаецца за спробы зарабіць на расійскіх санкцыях. Я думаю, за гэтую справу (кантроль за прадукцыяй) яны возьмуцца яшчэ больш сур’ёзна. Хоць, паўтаруся, можна рабіць лёгкую беларускую апрацоўку санкцыйных тавараў і законна адпраўляць у суседнюю краіну. Але дзейнічаць трэба вельмі асцярожна, таму што Крэмль наэлектрызаваны, а Беларусь яшчэ разлічвае на крэдыт ад усходняга суседа. Можна зарабіць на малым, але згубіць большае. Тут патрэбна вельмі гнуткая палітыка папаўнення бюджэту за кошт санкцый, каб не перагнуць палку".