Прафсаюзны лідар: пенсійны ўзрост могуць падвысіць ужо з наступнага года

Старшыня Беларускага прафсаюза радыёэлектроннай прамысловасці (РЭП) Генадзь Фядыніч мяркуе, што ўлады хацелі б падвысіць пенсійны ўзрост, але сістэма не падрыхтаваная да гэтага і патрэбныя адпаведныя рэформы.

"Улада прапанавала не ісці на пенсію, затое апошняя будзе на нейкім там працэнт павялічвацца. Колькі людзей на гэта пайшло? Мізер! Усе афармляюць пенсію. Зараз цэлы шэраг пенсіянераў не самі звальняюцца, а іх звальняюць у сувязі з заканчэннем тэрміну кантракта. Калі падвысяць пенсійны ўзрост, то паўстане пытанне: а хто будзе працаваць на заводах за такія капейкі? І ўвогуле, падвышэнне пенсійнага ўзросту не выратуе эканоміку Беларусі. Улады гэта цудоўна разумеюць. Таму што, паўтаруся, без рэфармавання эканомікі і пенсійнай сістэмы проста падвышаць узрост для пенсіянераў – гэта тое самае, што паставіць светлафор на вуліцы, дзе ён ужо стаіць", - заявіў Фядыніч для "Радыё Рацыя".

Прафсаюзны лідар адзначае, што ў краіне "сёння няма каму працаваць".

"Калі заўтра будзе на аднаго пенсіянера два працоўныя, то гэта – капец! ...Зусім верагодна, што паэтапнае падвышэнне пенсійнага ўзросту пачнецца ўжо з наступнага года," - мяркуе старшыня Беларускага прафсаюза радыёэлектроннай прамысловасці.

Нагадаем, напрыканцы жніўня Аляксандр Лукашэнка заявіў, што ў Беларусі пакульне разглядаюць пытанне падвышэння пенсійнага ўзросту. Але гэтага вымагаюць абставіны.

"Мы ўвогуле да гэтага пытання не падыходзілі. Я вам шчыра сказаў, што нам пенсійны ўзрост даўно трэба было павялічыць", - сказаў кіраўнік дзяржавы. Лукашэнка адзначыў, што ў Беларусі невысокія пенсіі, бо на аднаго пенсіянера прыходзицца занадта мала працуючых грамадзян.

"Гэта значыць, мы абцяжарваем сваіх дзяцей, - сказаў ён. - Калі вы хочаце, каб у краіне было столькі пенсіянераў на столькі працуючых - дзеля Бога, але пенсія будзе меншая. Таму мы пенсійнае пытанне не чапаем. Маё меркаванне вы ведаеце. Але вы гэтага не хочаце".