Правяраць даходы і выдаткі будуць толькі ў дармаедаў

Дакумент 13 кастрычніка быў апублікаваны на Нацыянальным прававым партале і набыў законную моц, перадае "Еўрарадыё".

У тэксце Інструкцыі не прапісаны дакладны пералік грамадзян, якіх закране гэты дакумент, што вылікала рэзананс у грамадскасці. Аднак сёння Міністэрства па падатках і зборах патлумачыла, што гэтае новаўвядзенне ўсё ж не закране ўсіх беларусаў.

Інструкцыя была прынятая ў мэтах рэалізацыі “дэкрэта аб дармаедах”, таму яе дзеянне распаўсюджваецца на ажыццяўленне кантролю за адпаведнасцю расходаў і даходаў грамадзян, якія не ўдзельнічаюць у фінансаванні дзяржаўных расходаў. Кантроль над даходамі-выдаткамі працуючых грамадзян па-ранейшаму будзе ажыццяўляцца на падставе дэкларацый аб даходах і маёмасці, гаворыцца ў прэс-рэлізе ведамства.

Разлік выдаткаў і даходаў грамадзян, якія доўгі час не працавалі, падатковыя органы будуць складаць толькі за перыяд з 1 студзеня 2015 года.

Як паведамляла Служба інфармацыі "ЕўраБеларусі", калі выдаткі грамадзяніна перавышаюць яго даходы, то на працягу пяці рабочых дзён з даты складання разліку грамадзяніну накіроўваецца пісьмовае патрабаванне аб дачы тлумачэнняў аб крынiцах даходаў. Даць іх трэба будзе ў пісьмовай форме цягам 30 каляндарных дзён. Грамадзянін павінен распісаць крыніцу даходу, памер і дату атрымання, а таксама, па жаданні, іншыя звесткі пра крыніцы прыбытку.

Пры гэтым грамадзянін мае права паведаміць звесткі пра крыніцы яго даходаў за любы перыяд, у якім ім атрыманы такія даходы, удакладняюць ў МПЗ. Такім чынам, непрацуючы сёння грамадзянін можа паказаць, што жыве за грошы, якія назапасіў да 1 студзеня 2015 года.

“Падаткаабкладанне даходаў, вылічаных з сум перавышэння выдаткаў над даходамі, будзе праводзіцца толькі ў выпадку, калі грамадзянін не дасць тлумачэнні аб крыніцах даходаў па пісьмовым патрабаванні падатковага органа або калі прадстаўленыя фізічнай асобай тлумачэнні не дазволяць вызначыць крыніцу даходаў”, — гаворыцца ў прэс-рэлізе МПЗ