Колькасць ІП на Гродзеншчыне працягвае скарачацца

Згодна з дадзенымі падатковай інспекцыі, у студзені іх лічба ў рэгіёне складала 28 тысяч 100 чалавек, а праз паўгады – ужо 27 тысяч 389. Неспрыяльныя ўмовы працы, высокія падаткі і стаўкі арэнднай платы, а таксама істотнае змяншэнне пакупніцкай здольнасці насельніцтва вымушаюць прадстаўнікоў малога бізнэсу Прынёмання сыходзіць з прафесіі, паведамляе «Радыё Рацыя».

- Па выходных яшчэ ходзяць людзі, а ў будні дзень вельмі мала. Продажы ўпалі. Вялікая канкурэнцыя, у тым плане, што ў нас горад вельмі маленькі. І міні-рынкі, і ледзь не ў кожнай краме… Рынак перанасыцілі вельмі.

- Шмат пустых месцаў ужо. Камунальныя плацяжы затым размяркоўваюць на тых, хто арыендуе. З пустых месцаў таксама. Я, канешне, іх таксама разумею. Але нам няма куды дзявацца. Многія сыходзяць.

Унёсак ІПшнікаў Гродзеншчыны ў кансалідаваны бюджэт вобласці за першае паўгоддзе склаў 190 мільярдаў 600 мільёнаў беларускіх рублёў, ці больш за 11 мільёнаў еўра ў эквіваленце, а унёсак недзяржаўнага сектара эканомікі ў бюджэт вобласці перавысіў 27%.