Пакуль Данькоў сядзіць, на месцы яго "прытона" ў Мінску азербайджанцы адчыняць новае казіно

Пра тое, што казіно ў будынку былога клубу адчыняць азербайджанцы, распавяла Наталля Данькова, жонка бізнесоўца, які знаходзіцца за кратамі, паведамляе «Радыё Свабода».

«Вядома толькі, што яны з Азербайджану. Падыходзілі да мяне, прадстаўляліся, вялі размовы пра выкуп ліфтаў ды іншага абсталявання, якое ім патрэбна, каб наладзіць працу казіно. Але зноў жа ўсё ўпіраецца ў гэты суд аб падзеле маёмасці. Калі рашэнне будзе, тады зможам канчаткова дамовіцца», - распавяла жанчына.

Скандальна вядомы «Данькоў-клуб» зачынілі два гады таму. Нагадаем, яго ўладальніка Юрыя Данькова прызналі вінаватым ва ўхіленні ад выплаты падаткаў, арганізацыі і стварэнні ў клубе прытона для занятку прастытуцыяй, уцягванні ў занятак прастытуцыяй і асудзілі на восем гадоў пазбаўлення волі з адбываннем пакарання ў папраўчай калоніі ва ўмовах узмоцненага рэжыму.

Клуб зачынілі, і ў канцы верасні 2013 года выселілі з будынка на Мяснікова, 25, дзе ён размяшчаўся за 20 гадоў. Афіцыйнай прычынай высялення стала нявыплата арэнды за 2 месяцы, праз якую ўтварылася запазычанасць перад ўласнікамі памяшкання ў 836 млн рублёў, піша tut.by.

Новага арандатара ў памяшканні не было амаль 1,5 года. А некалькі месяцаў таму будынак абнеслі плотам і пачалі рамонт. Высветлілася, што ўладальнік будынка, «Беларускае таварыства глухіх», ужо знайшоў новага арандатара памяшкання.

- Каб выбраць арандатара на гэта памяшканне, мы размясцілі аб'яву ў газеце, на якую адгукнулася тры фірмы, - распавялі tut.by у «Беларускім таварыстве глухіх». - Але ўмовы ў нас былі сур'ёзныя: па-першае, мы выбіралі надзейную кампанію, а па-другое, папярэдзілі, што будучы арандатар павінен зрабіць капрамонт будынка. Паводле закона, яго павінен рабіць ўладальнік будынка, гэта значыць мы, але паколькі ў нас ёсць фінансавыя цяжкасці, мы дамовіліся, што арандатар дасць нам пазыку, якую мы будзем вяртаць. Так і дамовіліся. Будынак будзе з тым жа функцыянальным прызначэннем: у ім будзе і рэстаран, і казіно.

Калі адкрыецца новая ўстанова, пакуль невядома - рамонт яшчэ ідзе поўным ходам. Дарэчы, арандаваць такое памяшканне нятанна – кошт больш за 400 мільёнаў рублёў у месяц.