Самае дарагое для беларусаў — паслуга

Паводле Нацыянальнага статыстычнага камітэту, у маі гадавая інфляцыя склала 13,7%. Больш за ўсё ў параўнанні з маем 2014 году ў краіне падаражэлі паслугі — на 22%. Нехарчовыя і харчовыя тавары выраслі ў кошце ў сярэднім на 12,1% і 12% адпаведна.

Больш за ўсё за год падаражэлі камунальныя плацяжы, лекі, гарбата і гародніна — больш чым на 30%, зазначае «Радыё Свабода», а вось палёты на самалётах, абутак і мяса хоць нязначна (да 2%), але патаннелі.

Калі параўнаць цэны за месяц, то ў маі яны выраслі ў сярэднім на 0,7%. Сярод паслуг за месяц больш за ўсё падаражэў танны ў параўнанні з леташнім годам паветраны транспарт, а таксама цягнікі міжнародных зносінаў. Сярод тавараў хутчэй за ўсё даражэлі мыйныя сродкі і лекі. А з прадуктаў харчавання на тле іншых прадуктаў значна вырас у цане цукар — амаль на 10%.