ІТ-бізнэс у Беларусі абрынецца праз арышт прадпрымальніка Пракапені?

З просьбай да Аляксандра Лукашэнкі звярнуліся кіраўнікі і саўладальнікі буйных беларускіх ІТ-кампаній. Яны просяць змяніць меру стрымання затрыманаму ІТ-прадпрымальніку Віктару Пракапені.

Нагадаем, што затрыманне вядомага прадпрымальніка адбылося ў сакавіку. Праваахоўныя органы вінавацяць яго ў незаконнай прадпрымальніцкай дзейнасці. Пракапеню пагражае да сямі гадоў зняволення, паведамляе tut.by.

У лісце бізнэсоўцаў гаворыцца, што Пракапеня шырока вядомы ў ІТ-сферы як сумленны бізнэсовец, які не хавае свой капітал і плаціць вялікія падаткі на ўзроўні сярэдняга завода. У кампаніі Пракапені няма кліентаў у Беларусі, але ён працягвае пастаянна пражываць тут, хоць даўно мог з'ехаць. На думку падпісантаў ліста, прадпрымальнік фактычна выконвае ролю інвестыцыйнага агента беларускага ўрада.

Калегі адзначаюць, што пры доказах віны Пракапеню трэба будзе судзіць. Але яго затрыманне па яшчэ не даказаным злачынстве і агульная рэакцыя ІТ-супольнасці можа прывесці да таго, што ўжо бліжэйшымі днямі замежныя партнёры многіх беларускіх ІТ-кампаній замарозяць бізнэс-аперацыі з Беларуссю.

Паводле папярэдніх ацэнак экспертаў, экспартная выручка Парка высокіх тэхналогій замест традыцыйнага штогадовага росту можа абваліцца на 30% і больш.

Падпісанты хадайнічаюць пра вызваленне Пракапені пад грашовы заклад. Таксама яны просяць вывесці з пад-арышту тыя яго актывы, якія не маюць дачынення да вылучанага абвінавачання.

Ліст падпісалі ўладальнік і заснавальнік партала tut.by Юрый Зісер, генеральны дырэктар СТАА "Сістэмныя тэхналогіі" Аляксандр Мукавозчык, генеральны дырэктар беларускага падраздзялення EPAM Systems Сяргей Дзівін ды іншыя. У аўторак, 7 красавіка, яго перададуць у Адміністрацыю прэзідэнта.