Прафсаюзны лідэр заклікае апазіцыю распрацаваць адзіную эканамічную праграму

Пра гэта старшыня прафсаюзу працоўных радыёэлектроннай прамысловасці Беларусі Генадзь Фядыніч заявіў «Радыё Рацыя». Зрабіць такую праграму вельмі цяжка, але неабходна. Сама сённяшняя сітуацыя да гэтага абавязвае, кажа палітык.

- Што сёння атрымліваецца з эканомікай? Хто б не прыйшоў да ўлады пасля Лукашэнкі, гэта будуць закладнікі той сістэмы, якая працуе сёння. Трэба будзе рабіць рэформы ў эканоміцы, трэба будзе рабіць рэформы ва ўсіх галінах. Гэта не будзе падабацца людзям. Але гэта павінны будуць зрабіць тыя, хто прыйдуць, таму што няма ніякага выйсця з гэтага становішча. Мабыць гэта будзе такі часовы ўрад, часовы прэзідэнт, таму што вельмі цяжкае зараз становішча і няма ніякага прасвету.

На думку Генадзя Фядыніча, да рэальных зменаў у Беларусі можа прывесці толькі аб’яднаны дэмакратычны рух, стварэнне якога будзе падтрымана знізу самімі людьмі. Рэальнасць паказвае, што мноства невялікіх партый і арганізацый не могуць нават дамовіцца адна з адной і дзейнічаць у адным накірунку.