Заробкі беларускіх праграмістаў адны з самых высокіх ва Усходняй Еўропе

Заробкі праграмістаў у Беларусі сёння вышэй, чым у шэрагу краін Усходняй Еўропы. Пра гэта заявіў дырэктар дзяржаўнай установы  "Адміністрацыя Парку высокіх тэхналогій" Валерый Цапкала падчас анлайн-канферэнцыі на сайце БелТА.

Валерый Цапкала растлумачыў, што ўзровень заработнай платы залежыць ад попыту і прапановы. "Попыт нараджае прапанову, і завышаныя зарплаты - гэта як раз вынік попыту на беларускіх праграмістаў", - адзначыў ён.

Па словах дырэктара ПВТ, сёння зарплаты беларускіх праграмістаў вышэйшыя, чым у іх калегаў у Чэхіі, Польшчы, Венгрыі і шэрагу іншых краін Усходняй Еўропы.

Нагадаем, у гэтым годзе для ПВТ планавалі ў тры разы павялічыць ўзносы ў Фонд сацыяльнай абароны насельніцтва, а таксама падняць з 9 да 10% стаўку падаходнага падатку для рэзідэнтаў ПВТ. Аднак ПВТ удалося адстаяць льготныя адлічэнні ў ФСАН.

Паводле звестак Белстата, у студзені сярэдні заробак у тых, чыя дзейнасць звязана з вылічальнай тэхнікай, склаў крыху больш за 23 млн рублёў, у Мінску гэты паказчык перавысіў 24,6 млн рублёў.

Кажучы пра перспектывы росту заробкаў у гэтай сферы, Валерый Цапкала адзначыў, што гэта магчыма ў выпадку, калі будуць узнікаць прадуктавыя кампаніі (не тыя, якія проста аказваюць паслугу, а распрацоўваюць свае прадукты). "Калі гэты прадукт з'яўляецца камерцыйна вельмі паспяховым, то кампанія, вядома, можа сабе дазволіць плаціць вельмі высокія зарплаты", - растлумачыў свой пункт гледжання дырэктар ПВТ.