Будаўнікі Беларусі праз дэвальвацыю расійскага рубля згубілі 60 млн долараў

Будаўнічая галіна Беларусі згубіла 60 мільёнаў долараў на дэвальвацыі расійскага рубля. Пра гэта заявіў намеснік міністра архітэктуры і будаўніцтва Аляксандр Сідараў падчас выніковай калегіі ведамства, паведамляе БЕЛТА.

Паводле ягоных словаў, на расійскі рынак прыпадае 78% беларускага экспарту будаўнічых матэрыялаў. А паколькі ў Расіі здарыўся эканамічны абвал, беларускія экспарцёры не выканалі прагнозныя паказнікі сваёй знешнеэканамічнай дзейнасці.

Апроч таго, айчынная прадукцыя стала занадта дарагой. Гэта адбываецца ў тым ліку з-за росту коштаў на энерганосьбіты, якія Беларусь аплочвае ў доларах. Канкурэнты ў Расіі маюць істотную перавагу, бо плацяць у расійскіх рублях, таму сабекошт іх тавараў ніжэйшы.

Эканамічны крызіс у Расіі ўдарыў не толькі па будаўнічай галіне - істотныя страты панеслі і беларускія вытворцы мясапрадуктаў.