“Беларусбанк” закрыў антыдэвальвацыйны ўклад

“Антыдэвальвацыйная” прапанова карысталася попытам у тых, хто падчас фінансавага крызісу застаўся з беларускімі рублямі на руках, але больш не верыў у трываласць нацыянальнай валюты. Даходнасць “Гаранта” разлічвалася па наступнай схеме. Ёсць асноўная стаўка — 10-15% гадавых, — а таксама дадатковая. Яна залежыць ад таго, наколькі вырасце афіцыйны курс даляра.

Напрыклад, калі праз год курс складзе 25 000 рублёў (вырасце амаль на 70%), то і стаўка даходнасці склала б больш за 80%, паведамляе “Наша ніва”.

Але калі курс замарозіцца, то кліент застанецца з асноўнымі 10—15%, і не больш за тое.

Гэты тып дэпазітаў стаў асабліва папулярным пасля ўвядзення валютнай камісіі і з’яўлення некалькіх курсаў. Тады існавала вельмі выгадная формула: “стаўка дэвальвацыі, памножаная на 4 + бонус 10%”. Тыя, хто тады адчуў сітуацыю і аднёс грошы ў банк, цяпер трымаюць свае рублі больш чым пад 150% гадавых!

У выніку банкі спачатку змянілі ўмовы па новых кантрактах — грошы можна было пакласці толькі на год, а максімальную стаўку абмежавалі.