ЗША абвясціў новыя санкцыі супраць беларускага прадпрыемства

Падставай для гэтага рашэння стала заключэнне ўрада ЗША аб парушэнні "Белзнешпрамсервісам" палажэнняў амерыканскага закона аб нераспаўсюджанні ў дачыненні да Ірана, Паўночнай Карэі і Сірыі, паведамляе "Наша ніва”.

У прыватнасці, гэта азначае ўдзел у перадачы названым краінам ці закупкам у іх тавараў, паслугаў і тэхналогій, якія падлягаюць кантролю згодна з шэрагам шматбаковых механізмаў экспартнага кантролю (Аўстралійская група, Васенаарскія дамоўленасці, Канвенцыя аб забароне хімічнай зброі, Рэжым кантролю над ракетнымі тэхналогіямі, Група ядзерных пастаўшчыкоў) ці могуць патэнцыяльна спрыяць распрацоўцы зброі масавага знішчэння ці сістэмаў крылатых ці балістычных ракет.

Акрамя "Белзнешпрамсэрвісу" санкцыі таксама ўведзеныя супраць шэрагу фізічных і юрыдычных асобаў з Венесуэлы, Ірана, Кітая, Паўночнай Карэі, Расіі, Сірыі і Судана.

Паводле паведамлення санкцыі будуць дзейнічаць на працягу двух гадоў пачынаючы з 19 снежня 2014 года. Варта адзначыць, што "Белзнешпрамсервіс" перыядычна становіцца аб’ектам амерыканскіх санкцый пачынаючы з 2004 года.

Рашэнне прадугледжвае: адмову ад дзяржаўных закупак урадам ЗША у названых у паведамленні асобаў ці заключэння з імі кантрактаў, за выключэннем рашэнняў дзяржаўнага сакратара ЗША; адмову ад выдзялення дапамогі ўрада Злучаных Штатаў названым асобам, за выключэннем рашэнняў дзяржаўнага сакратара ЗША; забарону на продаж названым асобам артыкулаў з афіцыйнага Пераліку боепрыпасаў ЗША і продаж любых тавараў і паслугаў абарончага прызначэння згодна з Законам аб кантролі над экспартам узбраенняў; забарону перадаваць вырабы, што кантралююцца Законам ЗША аб рэгуляванні экспарту 1979 года ці Правіламі рэгулявання экспарту.