Заснавальнік "Пракаповіч'а": Прадумваем, як арганізаваць безрызыкоўны абмен без сплаты пошліны

Сайт prokopovi.ch.у 2011-м годзе на працягу некалькіх месяцаў вызначаў курс долара ў Беларусі.

Раніцай 19 снежня сайт быў адключаны, а цяпер зноў запрацаваў.  

"Як падказвае жыццё і электронная пошта, сайт трэба зноўку падымаць, азбройваць і выпускаць на вуліцы сталіцы ды іншых гарадоў. Зараз гэтым і займаемся", - цытуе "Наша Ніва" стваральніка сайту, на якім здзяйсняліся аперацыі куплі-продажу валюты па-за банкамі.

"Відавочна, што да нас і да падобных сервісаў, якія з'явяцца неўзабаве, будзе прыкаваная ўвага праваахоўных органаў. Але мы гэта ўсё ўжо праходзілі. Прарвемся.

Іншая справа - ці атрымаецца арганізаваць безрызыкоўны абмен грошай без сплаты пошліны. Спадзяюся, што разам з карыстальнікамі нешта прыдумаем.

У 2011-м улады спрабавалі нас прыкрыць, але інтэрнэт такая штука - што ў яго трапіла, тое там і застаецца. За выходныя я прадумаю стратэгію нашых паводзін на бліжэйшую будучыню і змяшчу яе на сайце".