Вуліцы танкаў не баяцца

На прадпрыемстве, якое абслугоўвае мінскія дарогі заяўляюць, што дарогі пасля праходу танкаў у Мінску толькі падмятаюць, ніяк не рамантуюць.
На прадпрыемстве Гаррамаўтадар Мінгарвыканаму паведамілі, што ніводнага разу не рамантавалі дарогі ў Мінску пасля вайсковых парадаў. Тым часам кіроўцы кажуць, што пасля танкаў дарогі нагадваюць пральную дошку.

«Мяне не трасе, усё добра, не хвалюйцеся,» — сказаў карэспандэнту Радыё Свабода гендырэктар Гаррамаўтадару Дзяніс Глінскі.

Паводле галоўнага інжынэра Гаррамаўтадару Аляксандра Ярошыка, ніякіх скаргаў ад кіроўцаў на якасць дарог пасля парадаў да іх на прадпрыемства не паступала. Ён таксама кажа, што дарогі пасля танкаў не патрабуюць рамонту:

«Адзінае, што яны наносяць на разметку адбіткі. А ў цэлым ужо настроіліся. Атрымліваецца хіба што шумавы эфэкт з-за грабёнкі. Але з пункту гледжаньня тэхнічных характарыстык ні разу не было такога, каб пасля танкаў перакладалі асфальт альбо для іх перакладалі. У цэлым па нарматыве нармальна, адзінае, што зубамі яны робяць маленькія ракавіны, якія ствараюць шумавы эфэкт. Раней былі выпадкі, калі наяжджалі на бардзюры, але цяпер салдаты малайцы, навялі ў гэтым парадак. Можа быць урон, калі толькі з’едзе ўбок і нешта пашкодзіць, па асфальце ён нічога не зробіць такога звышнатуральнага. Маршрут пракладзены так, што і па мастах яны моцна не едуць, толькі па тых, якія вытрымаюць нагрузку. Нейкага звышурону і наогул урону няма. Калі б гэта былі ямы па калена, як іншы раз па вясне бывае...».

За вайсковай тэхнікай ідзе ўборачная, каб прыбраць сколы, якія робяць зубы на гусеніцах.

«Вось гэта змываюць і змятаюць, бо пойдзе пыл. Калі адкрыць рух па гэтым участку, то пойдзе пыл. А ў горадзе падняць пыл, потым мы тыдзень яго будзем прыбіраць. Дык мы яго адразу прыбіраем, каб яго не было. Інакш ён на дамах, на шкле асядзе, ён некуды ж дзенецца. А так мы яго змываем, змятаем у кучы і стараемся адразу сабраць, бо так зручней — адразу сабраць. Трэба ўсё прамесці адразу. Гэта ў выніку атрымаецца танней, чым потым перамятаць».

3 ліпеня ў Мінску адбудзецца вайсковы парад з удзелам каля 240 адзінак баявой тэхнікі, у тым ліку расійскай. На сёньня ўжо прайшлі дзве рэпетыцыі параду.