Беларусь і Венгрыя плануюць стварыць сумесны бізнес-савет

 Уладзімір Улаховіч канстатаваў вялікую цікавасць да эканамічнага форуму як з венгерскага, так і з беларускага боку. Каля 150 прадстаўнікоў венгерскіх кампаній прыбылі з розных рэгіёнаў Венгрыі, каб абмеркаваць з беларускімі партнёрамі перспектыўныя кантакты.

"Сёння настаў момант, калі беларускія і венгерскія прадстаўнікі бізнесу па-новаму глядзяць адзін на аднаго і адкрываюць для сябе новыя магчымасці", - сказаў намеснік старшыні БелГПП. Ён расказаў, што напярэдадні эканамічнага форуму адбылася сустрэча з калегам - прэзідэнтам Венгерскай гандлёва-прамысловай палаты Ласла Парагам, на якой былі абмеркаваны перспектыўныя фарматы ўзаемадзеяння паміж Беларуссю і Венгрыяй, паведамляе БЕЛТА.

Паводле слоў Уладзіміра Улаховіча, ёсць усе ўмовы для больш актыўнага развіцця сувязей паміж дзвюма краінамі. Беларусь - член Мытнага саюза, што адкрывае для еўрапейскага бізнесу вялікія магчымасці. У сваю чаргу Венгрыя з'яўляецца членам ЕС, што важна для беларускага бізнесу.

Беларуска-венгерскі эканамічны форум арганізаваны гандлёва-прамысловымі палатамі Беларусі і Венгрыі пры падтрымцы пасольства Беларусі ў Будапешце і Міністэрства замежных спраў Беларусі. Адбыліся двухбаковыя перагаворы паміж прадстаўнікамі беларускіх і венгерскіх дзелавых колаў.