НДА прапанавалi Мiнюсту паляпшэнне прававых умоў

У першыя дні новага 2012 года ў Міністэрства юстыцыі Рэпспублікі Беларусь быў накіраваны калектыўны зварот лідэраў шэрагу няўрадавых арганізацый краіны. У звароце прадстаўнікі грамадзянскай супольнасці паведамілі пра магчымыя шляхі паляпшэння прававых умоў дзейнасці грамадскіх аб’яднанняў краіны. Зварот быў ініцыяваны Асамблеяй няўрадавых дэмакратычных арганізацый Беларусі і адрасаваны персанальна новаму міністру юстыцыі Алегу Сліжэўскаму, які быў прызначаны на пасаду ў снежні мінулага года.

Як паведамляе прэс-служба Асамблеi НДА, ліст падпісалі кіраўнік РПГА "Беларускі Хельсінскі камітэт" Алег Гулак, старшыня ГА "Беларуская асацыяцыя журналістаў" Жанна Літвіна, кіраўнік Цэнтра "Супольнасць" і старшыня Рабочай групы Асамблеі НДА Сяргей Мацкевіч, кіраўнік Цэнтра па правах чалавека Раіса Міхайлоўскаяі дырэктар Цэнтра прававой трансфармацыі Вольга Смалянка.

У дакумэнце не толькі акцентуецца ўвага на найважнейшых праблемах у прававым рэгуляванні дзейнасці структур "трэцяга сектара", але таксама робяцца прапановы па магчымых мадэлях вырашэння гэтых праблем.

У прыватнасці, для стварэння спрыяльных ўмоў для ўзаемадзеяння некамерцыйных арганізацый з дзяржаўнымі структурамі ў справе ўдасканалення заканадаўства, датычнага некамерцыйных арганізацый, аўтары ліста лічаць мэтазгодным заснаваць спецыяльны грамадскі савет пры Міністэрстве юстыцыі з магчымасцю вылучэння ў склад такога савета прадстаўнікоў ад імя грамадскіх аб’яднанняў. У паўнамоцтвы такога органа можа ўваходзіць выказванне меркавання грамадскасці па праектах нарматыўных актаў, якія распрацоўваюцца Міністэрствам юстыцыі альбо знаходзяцца на экспертызе ў міністэрстве і закранаюць інтарэсы некамерцыйных арганізацый.

У лісце таксама звяртаецца ўвага новага міністра юстыцыі на тое, што цягам апошніх год міністэрства неаднаразова заяўляла пра магчымасць скасавання артыкула 193¹ Крымінальнага кодэкса, які карае за дзейнасць незарэгістраваных арганізацый. Таксама ўздымаюцца пытанні грамадскага кантролю за ўстановамі пенітэнцыярнай сістэмы, у тым ліку ў святле парад Камітэта ААН супраць катаванняў, якія былі зробленыя па выніках разгляду чарговай перыядычнай справаздачы Рэспублікі Беларусь па выкананні Канвенцыі ААН супраць катаванняў і іншых відаў жорсткага і бесчалавечнага абыходжання.

Як лiчаць падпiсанты, такі сваеасаблівы "наказ" лідэраў грамадзянскай супольнасці напачатку працы новага міністра юстыцыі будзе служыць мэтам паляпшэння камунікацыі паміж рэгіструючым органам і падкантрольным яму грамадскім структурам. Таксама аўтары ліста прапануюць міністру сустрэцца для абмеркавання шляхоў вырашэння ўзнятых у звароце пытанняў.

Запампаваць тэкст Зварота 

Служба інфармацыі "ЕўраБеларусі"