Фэст моладзевых арганізацыяў у Менску

Сябрам недзяржаўных моладзевых арганізацыяў прапануем узяць удзел у Фэсьце моладзевых арганізацыяў, які мае адбыцца 29 альбо 30-га траўня. 

Часта даводзіцца чуць: моладзевы рух у Беларусі згас, пра актыўнасьць моладзевых арганізацыяў чуваць усё радзей, а колькасьць моладзевых ініцыятываў ды іх сябраў імкліва скарачаецца. Аднак, нягледзячы на тое, што гэтыя сьцьверджаньні ў чымсьці маюць падставы, і што, насамрэч, у асяродку моладзі назіраецца пэўнае зацішша, - нельга забывацца на тое, што ў нашай краіне багата моладзевых арганізацыяў са сваімі гісторыямі посьпехаў і перамогаў, і што многія суполкі працягваюць працаваць, хоць і не рэклямуюць сваю дзейнасьць, а таксама ў апошнія гады ўзьнік шэраг новых ініцыятываў.

Мы б хацелі сабраць прадстаўнікоў усіх моладзевых арганізацыяў ды ініцыятываў дзеля таго, каб паказаць, што моладзевых рух, моладзевы актывізм у Беларусі існуе, нам ёсьць, чым ганарыцца і мы маем грандыёзныя пляны.

Фэст будзе складацца зь дзьвюх частак:

1.Фэстываль.

Прадстаўленьне пасьпяховай кампаніі, акцыі, іншай дзейнасьці, якой ганарыцца вашая арганізацыя. І якую хацела б паўтарыць ды, магчыма, запрасіць іншыя арганізацыі далучыцца. Вашыя рэцэпты посьпеху. Прэзэнтацыя мусіць займаць да 7 хвілін часу. Форма і фармат – любыя (слайды, пэрформансы, відэа, ды што заўгодна, галоўнае, каб прэзэнтацыя ня была выключна вуснай).

2.Канфэрэнцыя “Пэрспэктывы моладзевага руху у Беларусі”.

Пойдзе гаворка пра стан моладзевага руху,  пэрспэктывы, моладзевае лідэрства і сумесную дзейнасьць.

Ад адной арганізацыі на мерапрыемства запрашаюцца па 2-3 прадстаўнікі.

Аб намеры ўзяць удзел неабходна паведаміць да 22 траўня.

Таксама да 22 траўня паведамце, калі ласка, аб сваім жаданьні зрабіць прэзэнтацыю на Фэстывалі і/ці выступіць у якасьці дакладчыка на Канфэрэнцыі.

З аргкамітэтам можна зьвязацца праз тэл: +375 29 6855239 (Сяржук), e-mail: moladz@belngo.inf

Паводле рассылкі belngo.info