Конкурс эсэ "Інтэлектуальная спадчына Беларусі: постаці, ідэі і кантэксты"

Ідэі, канцэпты і ўяўленні, што нараджаліся на гэтай зямлі з’яўляюцца падмуркам і крыніцай для разумення культурай самой сябе, спробамі ўгледзецца ў свае мінулае і будучыню, складнікам самастойнага еўрапейскага мыслення, умовай самаасэнсавання і развіцця. Але, на жаль, імёны мысляроў, іх ідэі і канцэпты вельмі слаба ўсвядомлены і "ўзяты" ў культуру і ідэнтычнасць беларусаў.

Цягам апошняга года ў межах кампаніі "Цытуй сваё" шэраг грамадскіх арганізацый і ініцыятыў намагаліся звярнуць увагу шырокага кола беларусаў на той скарб, які мы ўсе разам маем — беларускае мысленне. Дзякуючы супольным намаганням, з’явіўся "Цытатнік беларускага мыслення", думкі беларускіх мысляроў ўвасобіліся ў арыгінальныя выявы для саколак, адбылася серыя публічных лекцый і дыскусій "Спадчына Ігната Абдзіраловіча".

Працягваючы гэты шлях у пазнанне і разуменне саміх сябе, мы прапануем новы творчы крок — конкурс эсэ, прысвечаных постацям, ідэям і кантэкстам паўставання беларускай інтелектуальнай традыцыі.

Мэта конкурса — узбуджэнне цікавасці да інтэлектуальнай спадчыны, творчае і рэфлексіўнае пераасэнсаванне і прысваенне традыцыі беларускага мыслення, стварэнне галерэі тэкстаў, якія разгортваюць разуменне беларускай культуры і ідэнтычнасці.

Мы прапануем звярнуцца да самых розных гістарычных перыядаў і культурных кантэкстаў паўставання беларускага мыслення: ад самых далёкіх часоў да нашых сучаснікаў, якія рабілі свой унёсак у традыцыю апошнія дзесяцігодзі.

Да разгляду прымаюцца арыгінальныя аўтарскія эсэ, у якіх праводзіцца аналіз, рэфлексія, канцэптуалізацыя ці робіцца працяг самых розных аспектаў беларускага мыслення. Працы павінны быць напісаны ў межах наступных тэматычных накірункаў:

1. Уяўляючы Беларусь. Ідэі і канцэпты ў беларускай традыцыі, праз якія ішло асэнсаванне Беларусі, грамадства, культуры, нацыі, яе мінуўшчыны і будучыні;
2. Унікальныя ідэі, тэорыі і падыходы як беларускі ўнёсак у еўрапейскую і сусветную думку;
3. Паўставанне і выбудова традыцыі: пераемнасць, разгортванне думак і ідэй ад мінулага ў будучыню;
4. Шлях і лёс інтэлектуала: постаці беларускай інтэлектуальнай традыцыі. Гістарычны, культурны і палітычны кантэксты інтэлектуальнай працы, выклікі і адказы, індывідуальныя траекторыі і творчасць;
5. Гісторыя беларускай інтэлектуальнай традыцыі: культурны кантэкст, абставіны і інстытуты развіцця мыслення;
6. Асобны накірунак! Асэнсаванне інтэлектуальнай спадчыны Ігната Абдзіраловіча.

У склад журы конкурса ўваходзяць:

• Уладзімір Мацкевіч, філосаф, метадолаг, заснавальнік Лятучага ўніверсітэта;
• Ірына Дубянецкая, бібліст, багаслоў і філосаф, акадэмічны дырэктар Беларускага калегіума;
• Міхаіл Баярын, філосаф, лінгвіст, санскрытолаг, перакладчык, паэт;
• Віталь Рыжкоў, літаратар, перакладчык, лаўрэат літаратурных прэмій "Дэбют" і "Залаты апостраф";
• Лідзія Міхеева, сацыёлаг, рэдактар аддзела культуры "Беларусского журнала".

Да ўдзелу запрашаюцца як сталыя навукоўцы, даследчыкі, літаратары, так і студэнты і пачаткоўцы, якія цікавяцца беларускай інтэлектуальнай спадчынай, шукаюць сваё месца ў традыцыі мыслення, прагнуць разумення і развіцця беларускай культуры і ідэнтычнасці.

Тэксты павінны быць раней не публікаваныя і напісаныя на беларускай альбо рускай мове. Памер тэкстаў: ад 10 да 25 тысяч знакаў.

Дасылаць свае працы трэба ў электронным выглядзе з пазнакай "На конкурс" на адрас электроннай пошты: [email protected] да 15 жніўня 2016 года.

Таксама абавязкова пазначце ў лісце сваё імя і прозвішча, кантактныя дадзеныя (адрас электроннай пошты, кантактны нумар тэлефона), сферу дзейнасці.

10 верасня 2016 года будзе абвешчаны шорт-ліст удзельнікаў. Пераможцы будуць абвешчаны падчас Тыдня беларускага мыслення на адмысловай імпрэзе.

Пераможцы атрымаюць каштоўныя ўзнагароды (электронныя кнігі), а ўсе аўтары эсэ з шорт-ліста — прыемныя падарункі. Найлепшыя працы ўдзельнікаў будуць апублікаваныя на сайтах Budzma.org, "Беларусского журнала", Лятучага ўніверсітэта, а таксама войдуць у альманах, які будзе выдадзены напрыканцы 2016 года.

У арганізацыйны камітэт конкурса ўваходзяць:

• Міжнародны кансорцыум "ЕўраБеларусь";
• Лятучы ўніверсітэт;
• Грамадская кампанія "Будзьма беларусамі!":
• Беларускі калегіум;
• "Мова Нанова";
• "Беларусский журнал";
• Кнігарня "ЛогвінаЎ".