30 студзеня ў Магілёве — лекцыя Валянціна Акудовіча "Спадчына Ігната Абдзіраловіча"

Разважаючы над ідэямі, прамоўленымі ў эсэ "Адвечным шляхам", сучасныя філосафы наноў актуалізуюць іх у прасторы сённяшняй Беларусі — тым самым, падштурхоўваючы і нас да рэфлексіі нашага жыцця, жыцця нашай краіны паводле створанай Абдзіраловічам сістэмы каштоўнасцей.

Сваімі думкамі ўжо дзяліліся філосафы Павел Баркоўскі — у Гародні і Ігар Бабкоў — Гомелі.

30 студзеня 2016 года ў межах гэтага цыкла філосаф Валянцін Акудовіч прамовіць у Магілёве лекцыю "Спадчына Ігната Абдзіраловіча". Лекцыя адбудзецца ў "Коле сяброў" (завул. Чкалава, 16). Пачатак у 15.00. Запрашаем усіх зацікаўленых — уваход вольны!

Валянцін Акудовіч: Творачы зруйнуем

"Творачы зруйнуем" — гэтыя словы канцуюць эсэ Ігната Абдзіраловіча "Адвечным шляхам". Хаця на іх звычайна не звяртаюць увагі, альбо спалохана спяшаюцца забыць. Як жа так! У школках заўсёды вучылі, што кожны творчы акт a priori ёсць цудам, якое адно вялічыць прыўкрасу жыцця, а тут...

Толькі не будзем спехам залічваць нашага хлопца (лічы падлетка) у нігілісты. Бо хаця ў гэтым эсэ яго геніальным суаўтарам ужо была смерць, прамаўляючы "Творачы зруйнуем", ён прамаўляў адну з самых жыццялюбных ідэй, якія я хоць ад каго чуў.

Эсэ пабачыла свет у 1921 годзе (праз два гады Ігнат памрэ). На тую пару Еўропа і Расійская імперыя апынуліся згамаванымі да астачы сусветнай вайной і шматлікімі рэвалюцыямі. Усюды бяда, смерць ды енк. І ўсё гэта нарабілі самі людзі, каб вызваліцца ад даўно спарахнелых формаў жыцця дзеля ўжо сапраўды "светлай явы"...

Менавіта тады Ігнат, які і сам добра хапануў той калатнечы, кажа: не гарматамі ды ненавісцю трэба руйнаваць аджылае, якое хапае за ногі жывых. Яго трэба руйнаваць ствараючы новае. Тварыць і тварыць, без стомы, як без стомы цячэ рэчка. Адно ў такім разе, магчыма, збыткоўнымі стануцца войны ды рэвалюцыі...

Выглядае быццам і наіўна, але...

Пра іншыя лекцыі гэтага цыкла чытайце на сайце Лятучага ўніверсітэта і на старонцы ў Фэйсбуку. 

UPD.: Сваімі думкамі ў межах цыкла лекцый, прысвечаных спадчыне Ігната Абдзіраловіча, падзяліліся: Павел Баркоўскі — у Гародні, Ігар Бабкоў — у Гомелі, Ірына Дубянецкая — у Віцебску, Міхаіл Баярын — у Маладзечне і Сяргей Дубавец — Бабруйску. Цыкл завяршыла публічная дыскусія.

UPD,: Відэазапіс лекцыі: