Адкрытая лекцыя Ірыны Махоўскай "Жыццё як гісторыя ці гісторыя пра жыццё: як паразумецца з мінулым"

Вусныя гісторыі пра жыццё існавалі спрадвеку, але легалізацыя штодзённага вопыту асобы як гістарычнай крыніцы адбываецца толькі ў ХХ стагоддзі, калі эмоцыі і паводзіны "маленькага чалавека" прызнаюцца важным ключом для разумення мінулага.

Што такое біяграфія? Літаральна — гэта апісанне жыцця. Але гэта заўсёды апавяданне, тэкст, які ўвасабляецца, калі чалавек расказвае аб сваім уласным жыцці. Захопленае ў нарацыю, жыццё становіцца інтэрпрэтацыйным цэлым, ствараючы сэнс таго, што насамрэч адбылося.

Як стасуецца фабула і сюжэт у аўтапрэзентацыі? Як чалавек выбірае жанр апавядання, упісваючы гістарычныя падзеі ва ўласнае жыццё? І як паразумецца з мінулым — гістарычным і асабістым?

16 снежня, у сераду, у межах серыі "Галоўнае пытанне" Лятучы ўніверсітэт запрашае на апошнююю ў гэтым календарным годзе адкрытую лекцыю. Кандыдат гістарычных навук Ірына Махоўская будзе прамаўляць на тэму "Жыццё як гісторыя ці гісторыя пра жыццё: як паразумецца з мінулым".

Слухачоў просім папярэдне зарэгістравацца. Інфармацыя пра месца правядзення будзе дасланая зарэгістраваным удзельнікам напярэдадні.

Нагадваем, што на сайце Лятучага ўніверсітэта змешчаны відэазапісы ўсіх лекцый — як серыі "Галоўнае пытанне", так і цыкла "Гораду і Свету", а таксама канспекты асобных лекцый.

Вашыя пытанні і прапановы скіроўвайце, калі ласка, да каардынатара лекцыйнай серыі на электронную скрыню: [email protected], ці патэлефанаваўшы на нумар: (+375 29) 7422040 (Юлія).

UPD.: Відэазапіс адкрытай лекцыі:

Гл. таксама інтэрв'ю з Ірынай Махоўскай напярэдадні лекцыі ды справаздачу аб адкрытай лекцыі