25 кастрычніка ў Полацку — падвоеная прэзентацыя-дыскусія "Беларуская культура — прастора выбару?"

Цэнтр еўрапейскай трансфармацы (ЦЕТ) супольна з Міжнародным кансорцыюмам "ЕўраБеларусь" запрашаюць культурніцкіх, грамадскіх, творчых дзеячаў, ініцыятывы і арганізацыі Полацка і Наваполацка на падвоеную прэзентацыю:

1. Прадстаўленне вынікаў "Маніторынгу рэалізацыі Рэспублікай Беларусь канвенцыі ЮНЕСКА аб ахове і заахвочванні разнастайнасці форм культурнага самавыражэння", зробленага летась камандай ЦЕТ першага сістэмнага аналізу сферы культуры Беларусі, які дае ўяўленне аб культурнай палітыцы краіны ў сучасным еўрапейскім кантэксце.

Акрамя ўласна вынікаў даследавання, эксперты ЦЕТ Таццяна Вадалажская і Андрэй Ягораў прапануюць абмеркаванне перспектыў новых падыходаў у культурнай палітыцы Беларусі. Культура як сфера нашага ўплыву: хто і як мусіць фармаваць беларускую культуру сёння? — цэнтральнае пытанне запланавай дыскусіі.

2. Знаёмства з магчымасцямі міжнароднага праекта "CHOICE" (Cultural Heritage: Opportunity for Civic Engagement), які будзе разгортвацца ў Беларусі, Украіне, Арменіі і Малдове ў бліжэйшыя два гады. Беларуская частка праекта — "СHOICE-Беларусь: спадчына і сучаснасць" — ставіць мэтамі пераасэнсаванне, ахову і аднаўленне матэрыяльнай і нематэрыльянай культурнай спадчыны Беларусі сіламі грамадзянскай супольнасці.

Каардынатары праекта шукаюць недзяржаўныя культурніцкія арганізацыі, ініцыятывы, творцаў і даследчыкаў, якія падзяляюць гэтыя каштоўнасці, а таксама гатовыя актыўна працаваць і на развіццё сваіх прафесійных кампетэнцый.

Абедзве прэзентацыі, самастойныя па змесце, закранаюць пытанні штодзённага выбару, які мы робім як разнастайныя гульцы на культурніцкім полі краіны: што ўваходзіць у сферу нашага уплыву на ўласную культуру і якія з магчымасцяў мы выкарыстоўваем? Да абмеркавання запрашаюцца ўсе, хто сапраўды шукае адказы.

Дата, месца і час правядзення імпрэзы: 25 кастрычніка (нядзеля). Полацк, Музей беларускага кнігадрукавання (вул. Ніжне-Пакроўская, 22). Пачатак у 14.00.