Перад “Маршам недармаедаў” у Оршы затрымалі журналістаў

Ператрусы ідуць у актывіста Канстанціна Анташкевіча і журналіста Беларускага Радыё Рацыя Арцёма Сізінцава. Да Сізінцава наведаліся два супрацоўнікі міліцыі, капітан Лаўрушкін і лейтэнант Шыбека з двума панятымі — шукаюць "фальшывыя купюры", паведамляе прэс-служба Беларускай асацыяцыі журналістаў. 

Старшыню гарадской арганізацыі АГП Валянціну Ігнаценка блакуюць дома: пасля 9-й раніцы сталі званіць і грукатаць у дзверы асобы ў цывільным у чорных шапачках. 

Па адрасе, дзе прапісаны рэдактар рэгіянальнага сайту оsha.eu Ігар Казмерчак, прыйшлі супрацоўнікі міліцыі. Каля яго пад'езда дзяжурыць чорная машына.

Актывіста Ігара Грышанава затрымалі на запраўцы на рэмзаводзе. Даставілі ў аддзяленне міліцыі.

Тым часам на вакзале супрацоўнікі Аршанскага УУС на транспарце затрымалі журналістаў Адар'ю Гуштын і Сяргея Гудзіліна, якія прыехалі з Мінску. Іх даставілі ў апорны пункт, паведамляе сайт spring96.org.

У журналісткі "Народнай Волі" ў цягніку, калі яна ехала ў Оршу, правяралі пашпарт.

Таксама затрыманы рэдактар сайта "Народные новости Витебска" Сяржук Серабро. "Фармальна нас не затрымалі, а забралі для праверкі пашпарты ды адвялі нас у залю падвышанай камфортнасці на вакзале. Сказалі, што правяраюць ці не здзейснілі мы нейкія злачынствы", — распавёў Сяргей baj.by.

Дакументы для праверкі забралі і ў віцебскіх карэспандэнтаў tut.by Таццяны і Ігара Мацвеевых.

Як паведамляла "ЕўраБеларусь", сёння акцыі супраць дэкрэту №3 пройдуць у Бабруйску, Рагачове і Оршы.