Дзяржаўныя тэлеканалы праігнаравалі Нобелеўскую лекцыю Алексіевіч

Учора лаўрэат Нобелеўскай прэміі 2015 года беларуская пісьменніца Святлана Алексіевіч выступіла з Нобелеўскай мемарыяльнай лекцыяй па літаратуры ў Шведскай Акадэміі.

Беларускія дзяржаўныя тэлеканалы цалкам праігнаравалі гэту падзею, піша "Радыё Свабода". З друкаваных СМІ толькі орган адміністрацыі прэзідэнта «СБ — Беларусь сегодня» у рубрыцы «Культура» апублікавала кароткую нататку «Слова лаўрэату», дзе паведамляецца, што «па традыцыі новыя лаўрэаты самай прэстыжнай прэміі свету прамаўляюць ўрачыстую прамову, якая называецца лекцыяй. Учора ўвечары ў Шведскай акадэміі з нобелеўскай лекцыяй выступіла беларуская пісьменніца Святлана Алексіевіч».

Ніводнай цытаты з нобелеўскай лекцыі Святланы Алексіевіч выданне не прыводзіць. Называецца толькі сёлетні памер прэміі — каля 970 тысяч даляраў.

Таварыства беларускай мовы звярталася да кіраўніка Белтэлерадыёкампаніі Генадзя Давыдзькі з просьбай аб жывой трансляцыі ўрачыстай цырымоніі ўзнагароджання беларускай пісьменніцы Нобелеўскай прэміяй, але адказу дагэтуль не атрымала.

На мінулым тыдні Cвятлана Краскоўская-Смалонская, прэс-сакратар Белтэлерадыёкампаніі, куды ўваходзяць і Першы тэлеканал — «Беларусь 1», культурніцкі тэлеканал «Беларусь 3», адмысловы канал «Культура», тлумачыла, што «ў сувязі з наяўнасцю пэўных арганізацыйна-тэхнічных, фінансавых і юрыдычных пытанняў і аспектаў Белтэлерадыёкампанія не планавала набыццё правоў на жывую трансляцыю цырымоніі ўзнагароджання Нобелеўскай прэміяй за 2015 год».

Нягледзячы на тое, што беларускае тэлебачанне не транслявала выступ, глядзець яго людзі сабраліся ў кавярнях, галерэях і сядзібах. У грамадстве распачынаецца акцыя "Святкуем Нобеля разам!" па святкаванні першай беларускай Нобелеўскай прэміі.