"Кірмаш праектаў" адбудзецца ў Магілёве 14 студзеня

Мэта праекта, па словах арганізатараў, "зрабіць культуру горада больш адчувальнай у нашым імклівым жыцці, аб’яднаць генератараў ідэй і тых, хто можа аказаць важную арганізацыйную, фінансавую ці аналітычную дапамогу". Пра гэта яны распавядаюць на сваім сайце.  

Каардынатары мепрапрыемства мяркуюць, што чарговы “Кірмаш” мае ўсе шанцы падтрымаць мінулагоднюю хуткасць нарошчвання грамадскага патэнцыялу развіцця Магілёва ўжо не проста як часовай культурнай сталіцы, а як выбітнага культурніцкага цэнтра ў Беларусі. Папярэдняя акцыя "Будзьма беларусамі!" - ток-шоў у Гомелі - таксама кранала згаданыя аспекты гарадскога жыцця.  

На “маланкавай прэзентацыі” ідэй для культуры горада будуць прадстаўленыя 10 праектаў, сярод якіх - ідэя мабільнага дадатку з самай запатрабаванай і “жывой” карыснай інфармацыяй пра Магілёў, стварэнне новых аб’ектаў, якія нададуць эмацыйнасці і асэнсаванасці публічнай прасторы горада і вернуць страчаны сімвалічны “падмурак” яго заснавання, а таксама задума па набліжэнне паэтычных скарбаў беларускай літаратуры да нашага штодзённага жыцця і гарадскі фестываль, здольны ўзмацніць субкультурніцкі імідж Магілёва. 

Кожны праект пройдзе праз фільтр грамадскай ацэнкі і аналітыкі на запатрабаванасць, унікальнасць і жыццяздольнасць у сённяшніх рэаліях Магілёва і Беларусі.

"Кірмаш" будзе ладзіцца а 18:00 у антыкавярні "Чердак" на вуліцы Ленінскай, 7.