Судовы разгляд альбому “Беларусь Прэс Фота 2011” на прадмет экстрэмізму будзе закрытым

Такое рашэнне прынята для таго, каб не была агучаная інфармацыя "аб змесце інфармацыйнай прадукцыі да судовага рашэння па справе", піша Еўрарадыё.

Мінулай восенню 41 асобнік фотаальбома “Беларусь Прэс Фота 2011” не здолеў пераехаць літоўска-беларускую мяжу — альбомы канфіскавалі мытнікі. Раней у Беларусь гэтыя альбомы ўвозіліся афіцыйна, для чаго былі зробленыя ўсе неабходныя дакументы. 5 красавіка сёлета адна з арганізатараў конкурсу, Юлія Дарашкевіч, атрымала ліст з КДБ, згодна з якім у выданні “утрымліваюцца мэтанакіравана змененыя, не адпавядаючыя рэчаіснасці здагадкі аб жыццядзейнасці Рэспублікі Беларусь”, а сам альбом “прыніжае нацыянальны гонар”. Фотаальбом прызналі экстрэмісцкім на падставе экспертнай ацэнкі. На 17 красавіка Юлію Дарашкевіч выклікалі ў суд Ашмянскага раёна.

Як піша ў сацыяльных сетках Дарашкевіч, ёй дазволілі перапісаць тэкст экспертызы альбома. Высветлілася, што экстрэмізм знайшлі нават у рубрыках "Спорт" і "Прырода".