18 траўня ў Мінску — прэзентацыя анталогіі сучаснага беларускага мыслення "Код прысутнасці"

"Магчыма, самае галоўнае, што адбылося ў жыцці краіны за апошні час, — гэта з’яўленне дыскурса сучаснага беларускага мыслення. Бо без яго Беларусь ніколі не змагла б зразумець і ўпарадкаваць самую сябе", — гэтае падсумаванне Валянціна Акудовіча датычаць часу ўзнікнення такіх знакавых для інтэлектуальнай гісторыі Беларусі праектаў, як энцыклапедычная серыя пад рэдакцыяй Аляксандра Грыцанава і "Анталогія сучаснага беларускага мыслення" пад рэдакцыяй Алеся Анціпенкі і Валянціна Акудовіча.

Каштоўнасць анталогій не толькі ў тым, што яны паказваюць багацце і разнастайнасць фактуры. Яны ствараюць пэўную праекцыю, даюць нам оптыку, якая дазваляе ўбачыць сітуацыю ў паўнаце, цэласна, пазначае адметнасць і адрознасць гэтага перыяду ў параўнанні з папярэднім.

Надышоў час зрабіць наступны "зрэз" і ўбачыць той інтэлектуальны і культурны даробак, які прынеслі нам 2000-20015 гады. Другі выпуск анталогіі беларускага мыслення выходзіць пад назвай "Код прысутнасці", самой гэтай намінацыяй пазнаючы новы этап існавання беларускага мыслення, яго сталенне і фармаванне выразных рысаў. У кнізе сабраныя тэксты розных жанраў і стыляў: тут і маніфесты, і метафізычныя развагі, крытыка падыходаў і рэакцыя на выклікі сучаснага свету, паглыбленне ў карані цывілізацыі ад самага пачатку і асэнсаванне Беларусі "якой яна ёсць".

18 траўня, у сераду, у мінскай Галерэі "Ў" (прасп. Незалежнасці, 37а) адбудзецца прэзентацыя анталогіі беларускага мыслення "Код прысутнасці". Пачатак у 18.30. Уваход вольны!

Сярод выступоўцаў і ганаровых гасцей — сябры Рэдакцыйнай рады: Таццяна Вадалажская, Валянцін Акудовіч, Ігар Бабкоў, Ірына Дубянецкая, Павел Баркоўскі, аўтары тэкстаў, якія ўвайшлі ў анталогію, а таксама іх блізкія і родныя. Вядоўца імпрэзы — Максім Жбанкоў.

Запрашаем усіх зацікаўленых далучыцца да падзеі — адчуць атмасферу інтэлектуальнага асяроддзя, сустрэцца з вядомымі мыслярамі, набыць кнігу і атрымаць аўтографы аўтараў.

З пытаннямі звяртайцеся да каардынатара імпрэзы Юліі Галіноўскай: (+375 29) 7422040, [email protected].