"Спеўны сход" заспявае "Магутны Божа"

На ім кожны ўдзельнік зможа самастойна выканаць творы, якія сталі класікай беларускай музычнай культуры. Да сумеснага выканання прапануюцца: "Магутны Божа", "Пагоня", "Ад веку мы спалі ды нас разбудзілі" і іншыя творы таго часу. Арганізатары ўпэўненыя, што "спеўнасходаўцы" возьмуць такую музычную вышыню.

Па словах мастацкага кіраўніка "Спеўнага сходу", саліста Белдзяржфілармоніі Сяргея Доўгушава, гэтыя песні ўплецены ў гісторыю фармавання беларускай дзяржаўнасці і неадрыўныя ад нашай гісторыі. Яны сталі натуральнай з’явай свайго часу, калі паўставалі новыя дзяржавы, у тым ліку і прамаці сучаснай Беларусі. Бліжэйшыя спеўныя сходы таксама будуць зробленыя на матэрыяле XX стагоддзя, зазначыў спявак. Гэта будуць "песні ваеннага часу" і "другой паловы мінулага стагоддзя".

"Уладзімір Тэраўскі, Мікола Равенскі і Мікола Куліковіч (Шчаглоў), музыка якіх прагучаць на "Спеўным сходзе", — знакавыя постаці айчыннай культуры, аўтары нашых нацыянальных гімнаў і стваральнікі нацыянальнага кірунку ў беларускай музыцы, — лічыць музыка і даследчык Максім Іўкін. — Іх лёсы склаліся няпроста. Уладзімір Тэраўскі быў расстраляны савецкімі ўладамі, а Равенскі і Куліковіч пайшлі ў вечны спачын на чужыне. Але іх культурная спадчына стала адным з зерняў, з якіх вырасла сучасная незалежная Беларусь".

Спецыяльны госць "Спеўнага схода" — Камерны склад мужчынскага хору "Унія".

Адрас: Мінск, вул. Куйбышава, 22, Прастора "Верх", 6-ы паверх. Пачатак у 19.00. Уваход вольны!

"Спеўны сход" увесну 2014 года распачалі Аляксей Чубат і Сяргей Доўгушаў. На "Спеўным сходзе" можа спяваць кожны чалавек. Праект дапамагае захоўваць нематэрыяльную культурную спадчыну Беларусі.