21 лютага — навуковае падарожжа на Гомельшчыну: "Радзіма радзімічаў"

Маршрут падарожжа:

Мінск — Бабруйск — Светлагорск — Рэчыца — Гомель.

Славянскі племянны хаўрус — радзімічы — асеў на ўсход ад Дняпра ў даліне Сожа. Паводле "Аповесці мінулых гадоў", радзімічы на чале са сваім князем Радзімам прыйшлі ў Беларусь з захаду — «от ляхов», то бок з Польшчы. Тут, паміж Дняпром і Сожам, яны знайшлі сабе радзіму і стварылі ўнікальную культуру.

Найбуйнейшым іх горадам быў, згаданы ў 1142 годзе ў летапісах, Гомель над Сожам, куды мы і выпраўляемся гэтым разам у навуковае падарожжа. Там, у сталіцы радзіміцкае радзімы, больш як паўтысячы гадоў стаяў магутны замак. У 1737 годзе ўладальнік Гомельскага староства князь Міхал Чартарыйскі рэканструяваў стары замак. Пасля захопу Беларусі Расійскай імперыяй у 1772 годзе, Гомель быў падараваны графу Румянцаву. Магутны замак, абнесены палісадам, быў раскіданы, а валы зрытыя. У 1785 годзе тут было распачата будаўніцтва каменнага палаца, з якога мы і пачнем знаёмства з Гомельскім палацава-паркавым ансамблем. Там мы ўбачым экспазіцыі, прысвечаныя гісторыі палаца, ягоных уладароў у XVIII — пач. ХХ стагоддзяў. Таксама агледзім славуты сабор Пятра і Паўла, старадаўнія цэрквы і каталіцкі касцёл Нараджэння Божай Маці. Нас чакае і шпацыр па старасвецкіх вуліцах Гомеля.

На шляху да радзіміцкае сталіцы мы праедзем па землях дрыгавічоў, дзе па дарозе ўбачым славуты Бабруйск над Бярэзінай, малады Светлагорск — колішнія Шацілкавічы, ды легендарную Рэчыцу над Дняпром!

Радзіма радзімічаў — край вялікіх рэк ды стражытных кураганаў — чакае нас!

Усіх, хто зацікавіўся нашым навуковым падарожжам, просім паведаміць па нумары тэлефона: (+375 29) 1802838 (Святлана).

Аб нашых вядоўцах:

• Ірына Дубянецкая — бібліст, багаслоў і філосаф, доктар сакральнай тэалогіі і доктар філасофіі (PhD), акадэмічны дырэктар Беларускага калегіума.
• Сяргей Харэўскі — мастак, мастацтвазнаўца, гісторык архітэктуры, літаратар, выкладчык ЕГУ, аўтар кнігі "Сто твораў ХХ стагоддзя. Нарысы па гісторыі беларускага мастацтва найноўшага часу".

Сачыце за навінамі мерапрыемства ў Фэйсбуку.