Навуковае падарожжа "Гатычны раман Беларусі"

Маршрут падарожжа:

Мінск - Ішкальдзь - Сынкавічы - Зэльва - Ваўкавыск - Гнезна - Мсцібаў - Шылавічы

Ад позняга сярэднявечча гатычныя саборы змушалі еўрапейцаў уздымаць галовы і думкі ўгару, фармавалі не толькі гарадскі ландшафт, але і культурную тоеснасць народаў, што стваралі і сузіралі гэтыя вытанчаныя цуды людскога духу, ведаў і майстэрства. А што ў нас?

Разам з хростам Літвы Ягайлам у Беларусь пранікае гатычны мастацкі і архітэктурны стыль, што неўзабаве апаноўвае цэлым краем. Паўсталі новыя пластычныя ўвасабленні веры. Сярод іншага - з’явілася наноў аб’ёмная скульптура, што стагоддзямі была ў забыцці. А ў мураваным будаўніцтве паўсталі такія ўдалыя і трывалыя канструкцыі, што служаць і дасёння, больш як паўтысячы гадоў! Ва ўсведамленні рамантыкаў на зломе XIX і ХХ стагоддзяў готыка ўвасабляла сабой і суворасць і ўзнёсласць, чысціню форм. Не дзіва, што ў тую эпоху да гатычных матываў звярнуліся з новай сілаю архітэктары і дызайнеры. Раман Беларусі з готыкай расцягнуўся да 1930-х гадоў!

Гатычныя і нэагатычныя шпілі працялі беларускае неба. Трывала ўраслі ў нашую зямлю храмавыя контрафорсы.

Готык непераможаны!
Готык імклівы, вечны!
Келіх лілеі Божае!
Наквець грамнічнай свечкі! -

пісала пра віленскую готыку Наталля Арсеннева. І мы задаемся дасёння пытаннем: няўжо гэтае хараство нашае, беларускае? Бо мы ж звыкліся з пачварамі безстылёвасці, якія запаланілі ўсю краіну цягам ХХ стагоддзя і якія мы навучыліся ўважаць сваімі - настолькі, што плодзім нашчадкаў-пачвар і дагэтуль. Што з намі сталася? Як маглі мы масава знішчаць свае найлепшыя шэдэўры ды незваротна мяняць аблічча сваёй краіны?

Цягам падарожжа, мы будзем даследаваць неацэнныя скарбы, што засталіся нам у спадчыну, і паспрабуем іх асэнсаваць і з імі атаясаміцца. Мы пазнаёмімся з найстарэйшым гатычным храмам Беларусі: касцёлам Святое Тройцы ў Ішкальдзі, з гатычнай царквою-крэпасцю Святога Міхала ў Сынковічах і касцёлам Святога Міхала ў Гнезна. А таксама ўбачым адныя з найлепшых інтэрпрэтацый гатычнае спадчыны: касцёлы Святое Тройцы ў Зэльве, Яна Хрысціцеля ў Мсцібаве, пабудаваныя паводле праектаў слыннага варшаўскага архітэктара Юзафа Пія Дзэконьскага, а таксама адзін з найбуйнейшых храмаў у нашай краіне - Святое Тройцы ў Шылавічах.

Дабраахвотны ўнёсак: 350 тыс. руб.

Па пытаннях удзелу ў вандроўцы звяртайцеся на адрас электроннай пошты: [email protected].

Сачыце за намі ў суполках:

• http://vk.com/event88596484
• https://www.facebook.com/events/855390604521657/