Канферэнцыя ЕГУ: "Еўропа-2015. Эфект перабудовы: рэжымы і рызыкі шматгалосых ведаў"

У 2015 годзе спаўняецца 30 гадоў ад пачатку пераўтварэнняў, якія атрымалі назву "перабудовы", чвэрць стагоддзя незалежнасці Літвы і 10 гадоў існавання ЕГУ ў Вільні. Арганізатары штогадовай студэнцкай канферэнцыі Еўрапейскага гуманітарнага ўніверсітэта выкарыстоўваюць гэты патройны юбілей, каб запрасіць студэнтаў бакалаўрыята і магістратуры, якія спецыялізуюцца ў самых розных галінах сацыяльных і гуманітарных навук, да міждысцыплінарнай размовы пра перабудову і яе эфекты, прачытаныя вельмі шырока.

У самой "перабудове" мы прапануем убачыць не толькі канкрэтна-гістарычную падзею, якая радыкальна змяніла палітычны і дыскурсіўны ландшафты сучаснасці, але і магутны канцэптуальны рэсурс для міждысцыплінарнай працы са зменамі, што ўносяцца ў сацыяльныя канструкцыі і практыкі ва ўмовах распаду аднаго сімвалічнага парадку і фармавання шматлікіх.

З гэтай перспектывы прапануем абмеркаваць, як трансфармуюцца веды пад уздзеяннем новых тэхналогій (камунікатыўных, культурных, навуковых), як рэжымы шматгалосся дасведчаных звязаныя з дэмакратызацыяй традыцыйных інстытутаў (адукацыі, рэлігіі, права), як паліфанія рэалізуецца праз прастору (публічную, гарадскую, віртуальную) і ў якой ступені новыя парадкі вытворчасці дэцэнтраваных ведаў дазваляюць артыкуляваць вопыт разнастайных сацыяльных груп, у тым ліку маргінальных. Кажучы аб эфектах "перабудовы", мы запрашаем да размовы пра старую/новую рыторыку ды інтэлектуальныя афекты, змену статуса тэорыі ды эканомікі ведаў, цэнтрабежнасць ды рыгіднасць, сляды і раны, акадэмічнае ўяўленне ды супраціў, лаяльнасць і дыскурсіўныя супольнасці, новыя інстытуцыялізацыі і дэфармаваныя сеткі, медыйныя інтэрвенцыі ды візуалізацыі, інтэрпрэтатыўныя рамкі ды фонавыя практыкі, палітыкі і тэхналогіі, заангажаваныя ў стварэнне і падтрыманне актуальнага шматгалосся.

Праз трыццаць - дваццаць пяць - дзесяць гадоў тыя светы, што былі перабудаваныя і перабудоўваюцца, не выглядаюць прасцейшымі. Разважаючы пра гэтае ўскладненне, мы прапануем зважаць не толькі на рэжымы і здабыткі, але і на рызыкі дэцэнтрацыі і шматгалосся, у тым ліку і на расчараванне рэфарматараў і палітычную апатыю грамадзян, геапалітычную нестабільнасць і недавер да тэорыі, войны памяці і новы ледавіковы перыяд.

Канферэнцыя адбудзецца 15-16 траўня 2015 года ў Вільні. Месца правядзення канферэнцыі: навучальны корпус Еўрапейскага гуманітарнага ўніверсітэта (вул. Валакупю, 5, Вільня, Літва).

Удзельнікі канферэнцыі будуць мець магчымасць пазнаёміцца з работай магістарскіх і бакалаўрскіх акадэмічных праграм ЕГУ.

Працоўныя мовы канферэнцыі: англійская, беларусская і руская.

Для ўдзелу ў канферэнцыі неабходна да 15 сакавіка 2015 года запоўніць і падаць анлайн-заяўку. Удзел у канферэнцыі - бясплатны (без рэгістрацыйнага ўнёску), але на падставе конкурса (будзе зроблены адбор заявак). Вынікі конкурснага адбору будуць паведамленыя не пазней за 2 красавіка 2015 года.

У межах працы канферэнцыі плануецца правесці наступныя секцыі:

• Сучасная сацыяльная тэорыя: перспектывы ў сітуацыі канцэптуальнага шматгалосся;
• Гісторыя на зломе эпох: выклікі мінулага/разнастайнасць будучыні;
• Гендэрны паварот у сацыяльных навуках: інакшыя даследчыя стратэгіі і формы асэнсавання сацыяльнасці;
• Перабудоўваючы веды: вялікія дадзеныя, аналітычныя платформы, візуалізацыя ды іншыя выклікі лічбавай гуманітарыстыкі;
• Папулярызацыя ўрбанізму і новыя прафесійныя ідэнтычнасці;
• "Перабудова" і дызайн: ці была перабудова ў дызайне?
• Працэсы "перабудовы" палітычных і эканамічных адносін у краінах Цэнтральнай і Усходняй Еўропы і Балтыі;
• Месца гістарычнай спадчыны Вялікага княства Літоўскага ў сучаснай Усходняй Еўропе;
• Вынікі рэфармавання публічнага адміністравання і новыя выклікі для эфектыўнай рэалізацыі публічнай палітыкі ў краінах ЦУЕ-рэгіёна і Балтыі;
• Перспектывы развіцця прыватнага права ў Еўрапейскім Саюзе і СНД;
• Канстытуцыяналізм і прававыя інструменты абароны правоў чалавека ў краінах Цэнтральнай і Усходняй Еўропы;
• Права на забыццё: сацыяльна-прававыя практыкі і механізмы канструявання постсавецкага разрыву;
• Рэлігія і працэсы мадэрнізацыі ва Усходняй Еўропе;
• Практычная псіхалогія ў постсавецкім рэгіёне: асаблівасці генеалогіі і перспектывы развіцця;
• Рэжымы працы са спадчынай: змена парадыгм;
• Сацыяльныя выклікі сучасных біятэхналогій;
• Навука і тэхніка ± светлая будучыня;
• Мастацтва да і пасля "перабудовы";
• Медыякультура: тэхналагічная і сацыяльная перабудова;
• Кінематограф у кантэксце лічбавай культуры: тэхналогіі, эстэтыка і новыя рэцэптыўныя практыкі;
• Новы погляд: гледжанне як культурная тэхналогія;
• Савецкі праект паміж будоўляй і "перабудовай".

Падрабязныя апісанні кожнай секцыі вы можаце знайсці па спасылцы.

Візавая падтрымка

Студэнты, якім неабходная візавая падтрымка, павінны ў заяўцы пазначыць пашпартныя звесткі для атрымання віз. Віза выдаецца бясплатна.

Жытло

На перыяд правядзення канферэнцыі (15-16 траўня 2015 года) усім удзельнікам прадастаўляецца жытло (бясплатна).

Кантакты

Кантактны адрас электроннай пошты: [email protected]. За абнаўленнямі сачыце на старонцы канферэнцыі, а таксама на старонках ЕГУ ў сацыяльных сетках.