Семінар-кансультацыя па рэгістрацыі некамерцыйных арганізацый у Магілёве

Да ўдзелу запрашаюцца прадстаўнікі ініцыятыўных груп з Магілёва і Магілёўскай вобласці, якія маюць намер распачаць працу па рэгістрацыі грамадскага аб’яднання альбо іншай некамерцыйнай арганізацыі.

Семінар-кансультацыя адбудзецца 18 кастрычніка 2014 года ў Магілёве ў Грамадскім цэнтры "Кола" (зав. Чкалава, 16), пачатак а 12-й гадзіне.

Падчас семінара будуць разгледжаныя асноўныя арганізацыйна-прававыя формы некамерцыйных арганізацый ды іх адрозненні ў прававым статусе і парадку рэгістрацыі, згодна з актуальным заканадаўствам. Адмысловая ўвага будзе нададзена тым зменам, якія адбыліся ў парадку стварэння грамадскіх аб’яднанняў праз уступленне ў сілу ў лютым 2014 года паправак да Закону "Аб грамадскіх аб’яднаннях", а таксама змяненням у прававым рэгуляванні ўзгаднення назваў некамерцыйных арганізацый.

Удзельнікам будзе прадстаўлена інфармацыя адносна парадку ды практыкі рэгістрацыі грамадскіх аб’яднанняў, устаноў і фондаў, а таксама дадзеныя індывідуальныя кансультацыі ды парады па падрыхтоўцы рэгістрацыйных дакументаў. Удзельнікі семінара будуць мець магчымасць у далейшым атрымаць кансультацыі па падрыхтоўцы дакументаў для дзяржаўнай рэгістрацыі некамерцыйных арганізацый ды па іншых прававых пытаннях.

Трэнерамі на семінары будуць дасведчаныя юрысты ў галіне беларускага некамерцыйнага права: дырэктар Цэнтра прававой трансфармацыі Вольга Смалянка, юрыстконсульт Асамблеі НДА Юрый Чавусаў ды іншыя эксперты.

Арганізатары семінара будуць радыя вітаць на мерапрыемстве не больш за аднаго прадстаўніка ад кожнай з ініцыятыўных груп, што маюць намер рэгістраваць некамерцыйную арганізацыю.

Каб падаць заяўку на ўдзел у семінары, трэба запоўніць электронную анкету ўдзельніка, якая знаходзіцца па спасылцы. Апошні тэрмін падачы заявак на ўдзел у семінары-кансультацыі: 15 кастрычніка 2014 года.