Запрашэнне на дыскусію "Дзе ў Сусвеце плыве Беларусь"

Да 31 жніўня ўсе зацікаўленыя змогуць убачыць гістарычныя артэфакты, якія прадстаўляюць Беларусь у іншых гістарычных ракурсах і маштабах.

Да старажытных мапаў можна ставіцца па-рознаму: можна ўспрымаць іх толькі як творы мастацтва, захапляючыся жывапіснай і друкарскай культурай мінулых стагоддзяў. А можна адкінуць простую сузіральнасць, паквольнае эстэцтва і скіраваць свой погляд праз плашчыню бачнага па той бок - у глыбыні прасторы па-за часам і каардынатамі. Каб інтэрпрэтаваць візуальныя артэфакты як культурныя феномены, умець аналізаваць іх кантэкст і логас, трэба быць узброеным адпаведнай інтэлектуальнай оптыкай. Ці ж можа неабыякавы наведвальнік выставы не спакусіцца на прапанову здзейсніць такі візуальна-прасторавы пераход?

Арганізатары выставы - Беларуская філасофская прастора, Лятучы ўніверсітэт, Выдавецтва "Эканомпрэс", Крэатыўная прастора "ЦЭХ" - запланавалі дзеля гэтага дзве інтэлектуальныя імпрэзы:

• дыскусію "Дзе ў Сусвеце плыве Беларусь" (1 жніўня, 18.00, Крэатыўная прастора "ЦЭХ");

• дыскусію "Беларуская картаграфія як дысцыпліна і падмурак самавызначэння" (13 жніўня, 18.00, Крэатыўная прастора "ЦЭХ").

Першая дыскусія скіроўвае нас да праблемы незавершанасці этнакультурнай самаідэнтыфікацыі беларусаў:

• Як і дзе мы "знаходзім сябе"?

• У якіх межах вызначаем: геаграфічных, палітычных, культурных?

• Калі ўспрымаць мапы як своеасаблівую оптыку канкрэтнай эпохі, то наколькі здольныя старажытныя мапы стаць сродкам трансфармацыі свядомасці сучасных беларусаў?

Над гэтымі і іншымі пытаннямі разважаюць запрошаныя дыскутанты: філосаф і літаратар Ігар Бабкоў, багаслоў і культуролаг Ірына Дубянецкая, дызайнер і паэт Міхал Анемпадыстаў, філосаф Аляксандр Сарна. Вядучы дыскусіі - філосаф Павел Баркоўскі.

Дыскусія "Дзе ў Сусвеце плыве Беларусь" адбудзецца 1 жніўня 2014 года ў Крэатыўнай прасторы "ЦЭХ" (Мінск, прасп. Незалежнасці, 58, к. 6, уваход з боку вул. П. Броўкі). Пачатак у 18.00. Уваход вольны!

Што тычыцца дыскусіі "Беларуская картаграфія як дысцыпліна і падмурак самавызначэння", то тут арганізатары рыхтуюць пэўную інтрыгу. Падрабязнасці - у бліжэйшы час. Сачыце за актуальнай інфармацыяй на сайтах арганізатараў: www.fly-uni.org, www.prastora.org.