"Urbi et Orbi" у Віцебску: Міхась Скобла (абноўлена)

Звяртаем вашу ўвагу, што час правядзення мерапрыемства змяніўся!

31 траўня адбудзецца развітанне з паэтам Генадзем Бураўкіным. Па гэтай прычыне дзень правядзення аб'яўленай раней публічнай лекцыі Міхася Скоблы "Голас і Логас Рыгора Барадуліна" перанесены на 6 чэрвеня. 

Родныя мясціны для творцы маюць выключнае значэнне, гэта не проста блізкія сэрцу краявіды - ёсць у іх нешта сакральнае. У іх - крыніца натхнення, прычына радасці, смутку і болю, у родных мясцінах - вытокі тых сіл, якія дапамагаюць паэту дашуквацца глыбінных сэнсаў роднага Слова.

Паэт і літаратуразнаўца Міхась Скобла звернецца да прысутных з пытаннямі, на якія мы, напэўна, будзем шукаць адказы не адно дзесяцігоддзе. Ці ацанілі мы напоўніцу, з кім жылі побач? Як разгадаць мову Барадуліна? У чым таямніца і чараўніцтва вобраза Маці ў барадулінскай паэзіі? Наколькі ж сапраўды беларусы ведаюць свайго Паэта: як асобу, як творцу, наколькі разумеюць глыбіню і сутнасць ягонага слова?

"Барадулінская паэзія акумулявала ў сабе і беларускую мудрасць, і беларускую дабрыню, і беларускі досціп. Усё наша шматпраяўнае быццё адлюстравалася ў ёй, і глядзім мы з радасным здзіўленнем на тое адлюстраванне: а мы, аказваецца, і цікавыя, і самадастатковыя, і нябедныя, і хадзіць нам у пазыкі да чужога дзядзькі не варта. Паводле сваёй метафорыкі, вобразатворчасці сваёй Барадулін папросту не мае сабе роўных. Беларусі ён дадзены як бы навырост. Чытаючы і спасцігаючы яго, мы будзем расці: і духоўна, і нацыянальна", - сказаў у інтэрв’ю напярэдадні мінскай лекцыі Міхась Скобла.

Запрашаем да спазнання Рыгора Барадуліна!..

Лекцыя адбудзецца 6 чэрвеня 2014 года ў залі Віцебскага цэнтра сучаснага мастацтва (вул. Белабародава, 5). Пачатак у 18.00. Уваход вольны!

Больш інфармацыі пра лекцыі "Гораду і Свету" на старонцы: http://fly-uni.org/urbi-et-orbi.