Публічная дыскусія аб ролі Першай сусветнай вайны для рэгіёна Цэнтральна-Усходняй Еўропы

Мерапрыемства ладзіцца ў рамках Трэцяй Міжнароднай канферэнцыі Інстытута палітычных даследаванняў "Палітычная сфера": "Войны ў палітычнай і культурнай традыцыі Беларусі і краін Цэнтральна-Усходняй Еўропы".

Арганізатарамі дыскусіі выступілі: Інстытут палітычных даследаванняў "Палітычная сфера", Лятучы ўніверсітэт і Міжнародны кансорцыум "ЕўраБеларусь".

Першая сусветная вайна на Захадзе называецца Вялікай. Але для Беларусі яна заўжды ў цені іншай Вялікай вайны - Айчыннай. Хоць абедзве падзеі перагарнулі ўвесь сусвет, змянілі межы ва ўсім рэгіёне і пакінулі на Беларусі крывавы след, але адну вайну мы памятаем, а пра другую практычна забыліся. Чаму так адбылося? 100-гадовы юбілей ад пачатку Першай сусветнай вайны - выдатная нагода, каб узгадаць пра гэту падзею і яе значэнне для нашай краіны.

Які ўплыў аказала Першая сусветная вайна на палітычную і сацыяльную сітуацыю ў нашым рэгіёне? Як разгортвалася нацыянальнае будаўніцтва ў ваеннай віхуры? Ці выглядала б па-іншаму палітычная мапа Еўропы, калі б не адбылася вайна? Ці можна назваць паўставанне беларускай дзяржаўнасці "вынікам" Першай сусветнай вайны?

Гэтыя пытанні будуць абмяркоўвацца падчас публічнай дыскусіі "Першая сусветная вайна, фармаванне нацый і паўставанне дзяржаў Цэнтральна-Усходняй Еўропы", якая абдудзецца 31 траўня 2014 года ў Мінску на пляцоўцы Крэатыўнай прасторы "ЦЭХ" (прасп. Незалежнасці, 58, к. 6). Пачатак у 15.00. Уваход вольны!

У якасці дыскутантаў запрошаныя:

• доктар гістарычных навук Алесь Смалянчук (Інстытут славістыкі Польскай акадэміі навук);
• кандыдат гістарычных навук Уладзімір Ляхоўскі (БДУ);
• доктар гісторыі Рымантас Мікніс (Інстытут гісторыі Літвы);
• доктар гісторыі Яанна Героўска-Калаўр (Інстытут гісторыі Польскай акадэміі навук).

Мадэратар дыскусіі - кандыдат гістарычных навук Алесь Пашкевіч.

UPD.: Відэазапіс публічнай дыскусіі: