Семінар-кансультацыя "Стварэнне і рэгістрацыя некамерцыйных арганізацый"

Падчас семінара будуць разгледжаны асноўныя арганізацыйна-прававыя формы некамерцыйных арганізацый ды іх адрозненні ў прававым статусе і парадку рэгістрацыі, згодна з актуальным заканадаўствам. Адмысловая ўвага будзе нададзена тым зменам, якія адбыліся ў парадку стварэння грамадскіх аб'яднанняў праз уступленне ў сілу ў лютым 2014 года паправак да Закона "Аб грамадскіх аб'яднаннях". Удзельнікам будзе прадстаўлена інфармацыя адносна парадку ды практыкі рэгістрацыі грамадскіх аб'яднанняў, устаноў і фондаў, а таксама дадзеныя індывідуальныя кансультацыі ды парады па падрыхтоўцы рэгістрацыйных дакументаў. Удзельнікі семінара будуць мець магчымасць у далейшым атрымаць кансультацыі па падрыхтоўцы дакументаў для дзяржаўнай рэгістрацыі некамерцыйных арганізацый.

Трэнерамі на семінары будуць дасведчаныя юрысты ў галіне беларускага некамерцыйнага права: Вольга Смалянка, дырэктар Цэнтра прававой трансфармацыі (Lawtrend), Юрый Чавусаў, юрысконсульт Асамблеі НДА ды іншыя эксперты.

Да ўдзелу запрашаюцца прадстаўнікі ініцыятыўных груп з Мінска і рэгіёнаў, якія маюць намер распачаць працу па рэгістрацыі грамадскага аб'яднання альбо іншай некамерцыйнай арганізацыі. Арганізатары семінара будць рады вітаць на мерапрыемстве не больш чым па адным прадстаўніку ад кожнай з ініцыятыўных груп, што маюць намер рэгістраваць некамерцыйную арганізацыю.

Каб падаць заяўку на ўдзел у самінары трэба запоўніць электронную анкету ўдзельніка.

Семінар-кансультацыя адбудзецца 17 траўня 2014 года ў Мінску ў памяшканні Цэнтра прававой трансфармацыі (вул. Нававіленская, 38-10, другі паверх).

Рэгістрацыя ўдзельнікаў - з 11.00, пачатак - у 11.30.

Апошні тэрмін падачы заявак: 12.00 (па мінскім часе), 14 траўня 2014 года.