"Urbi et Orbi" у Віцебску: Ірына Дубянецкая

Сённяшняя Еўропа паўстала з мінуўшчыны духоўна і гістарычна хрысціянскай. Пэўную колькасць стагоддзяў Біблія была своеасаблівым каталізатарам развіцця еўрапейскай культуры і самасвядомасці. Вядома, што беларускія землі не выключаны з гэтага працэсу: скарынаўскі пераклад Бібліі з’явіўся ў ліку першых, і наша культурная традыцыя падмацаваная агульнахрысціянскай.

Развіццё after-постмадэрнай рэчаіснасці здзяйсняе грунтоўнае пераасэнсаванне гісторыі, але не можа быць па-за яе ўплывам. Сучасны глабалізаваны свет усё часцей называюць постнацыянальным, аднак пытанне нацыянальнага самасцвярджэння застаецца актуальным. Асабліва выразна гэта характарызуе Беларусь. У такіх умовах кропкай грамадскай еднасці можа стаць культурны праект з абрысамі і сутнасцю нацыятворчага праекта - напрыклад, стварэнне беларускай Бібліі.

Даследчык біблійных тэкстаў, доктар тэалогіі і філасофіі Ірына Дубянецкая адстойвае права беларусаў мець сваю Біблію, перакладзеную на родную беларускую мову з арыгінальных: яўрэйскай, арамейскай і грэцкай моў. Паслухаць яе аргументы і абмеркаваць рэальныя перспектывы такога праекта будзе магчыма падчас публічнай лекцыі, якая ладзіцца 12 красавіка 2014 года ў Віцебску Лятучым ўніверсітэтам і Міжнародным кансорцыумам "ЕўраБеларусь".

Публічная лекцыя Ірыны Дубянецкай "Беларуская Біблія. Нацыятворчы праект у постнацыянальным свеце" адбудзецца 12 красавіка 2014 года па адрасе: Віцебск, вул. Белабародава, 5, вялікая зала Музея "Віцебскі цэнтр сучаснага мастацтва". Пачатак а 17-й гадзіне. Уваход вольны!

Больш падрабязна пра цыкл публічных лекцый "Urbi et Orbi" Лятучага ўніверсітэта: http://fly-uni.org/urbi-et-orbi.