"Urbi et Orbi" у Віцебску: Міхал Анемпадыстаў

Мастак, дызайнер, архітэктар і звычайны абывацель - кожны з іх па-свойму адчувае на сабе ўздзеянне культуры і кожны па-свойму аказвае свой уплыў на фармаванне яе адметнасці, стварэнне той візуальнай рэчаіснасці, якая маркіруе нас як беларусаў, дапамагае (альбо наадварот - ускладняе) усвядоміць сваё месца ў свеце. І кожны з іх будзе рабіць гэта, зыходзячы са свайго разумення "прыгожага". Пры гэтым хтосьці, ствараючы новы вобраз, будзе дакапвацца да сутнасці "простых рэчаў", разбірацца з традыцыяй, яе ўнутранымі эстэтычнымі законамі, а хтосьці будзе ствараць "аграгламурны трэш" чарговых Дажынак. Ну... як кажуць, "на густ і колер таварышаў няма".

Але пачуццё стылю, разуменне "прыгожага" - гэта далёка не толькі справа густу кожнага, гэта адлюстраванне актуальнага стану культуры, у якую мы ў той ці іншай ступені аказваемся ўклучанымі. Наколькі наш сённяшні выбар той ці іншай культурнай мадэлі грунтуецца, падпітваецца нашай традыцыяй?

"Стылізаваць візуальныя, архітэктурныя, рэкламныя прадукты трэба паводле нацыянальных каштоўнасцей", - упэўнены дызайнер Міхал Анемпадыстаў - лектар наступнай публічнай лекцыі цыкла "Urbi et Orbi" у Віцебску. Арганізатары цыкла - Лятучы ўніверсітэт і Міжнародны кансорцыюм "ЕўраБеларусь" - запрашаюць усіх зацікаўленых 22 лютага 2014 года ў віцебскі Цэнтр рамёстваў "Задзвінне" (вул. Чайкоўскага, 3), у 18.00, не толькі паслухаць пра "Колер Беларусі", але і стаць сведкамі таго, як лектар працуе з фактурай беларускай рэчаіснасці, беларускай традыцыі.

Якім колерам аддавалі перавагу продкі сучасных беларусаў? Як і чаму менавіта гэтыя колеры зрабіліся "нашымі"? Як праяўляюцца ўзаемасувязі паміж колерам і нашай культурай, колерам і рэлігіяй, колерам і нашай ментальнасцю? Як увогуле можна працаваць з колерам, намінуючы яго як "нацыянальны маркер"?

Шукаем адказы на гэтыя пытанні разам з дызайнерам, мастаком, паэтам, культурным дзеячом Міхалам Анемпадыставым. Лекцыя "Колер Беларусі", 22 лютага 2014 года, 18.00, Цэнтр рамёстваў "Задзвінне" (Віцебск, вул. Чайкоўскага, 3). Уваход вольны!

Прапануем вашай увазе інтэрв’ю Міхала Анемпадыстава, якое ён даў напярэдадні мінскай лекцыі.