"Urbi et Orbi" у Віцебску: Аляксей Ластоўскі

Напрыканцы года жаданне азірнуцца, вярнуцца ў сваю, хаця б недалёкую, мінуўшчыну, уласціва многім. Лятучы ўніверсітэт і Міжнародны кансорцыюм "ЕўраБеларусь" у Віцебску разам з чарговым лектарам цыкла "Гораду і Свету" Аляксеем Ластоўскім запрашаюць слухачоў да асэнсавання гісторыі і памяці пра яе. Тэма ягонай лекцыі - "Беларуская гістарычная памяць: досвед сацыялагічных даследаванняў".

Актуальная ў нашы дні праблематыка памяці і ідэнтычнасці выклікае шэраг дыскусій. На беларускай глебе яна мае асаблівы каларытны вобраз. Які ён - выяўлены метадамі сацыялогіі? Пра гэта і не толькі паразмаўляем са спадаром Ластоўскім. Тым больш, што ён ужо абяцае раскрыць пэўную колькасць пытанняў:

• Як уяўляюць гісторыю сваёй краіны жыхары Беларусі?
• У якой ступені захаваліся вобразы мінулага, сфармаваныя ў савецкія часы?
• Наколькі трывалая тэндэнцыя нацыяналізацыя гістарычнай памяці?

Мяркуем, гэта толькі пачатак працяглага спісу. Усе прысутныя змогуць далучыць да яго свае пытанні і адказы, паразважаць, абмеркаваць і адчуць уласную прыналежнасць да той прасторы мыслення, якая верыць, думае, стварае Беларусь.

Да ўдзелу запрашаюцца ўсе жадаючыя!

Публічная лекцыя Аляксея Ластоўскага "Беларуская гістарычная памяць: досвед сацыялагічных даследаванняў" адбудзецца 21 снежня 2013 года па адрасе: г. Віцебск, вул. Белабародава, 5, вялікая зала Музея "ВЦСМ". Пачатак у 14.00.  Уваход вольны!