"Urbi et Orbi" у Магілёве: Валянцін Акудовіч

Ужо прамінула амаль паўтара стагоддзя як была актуалізавана ідэя нацыянальнай Беларусі. І ўвесь гэты час яе падтрымлівалі, на яе працавалі і дзеля яе нават ахвяравалі сваімі жыццямі найлепшыя людзі нашага краю. Аднак і сёння мы з сумам канстатуем, што нацыі ў нас як не было, так і няма. Што ў лепшым выпадку яна знаходзіцца ў стане глыбокай недапраяўленасці.

Дык хто вінаваты ў гэтым: польскі месіянізм, расійскі імперыялізм, камуністычны таталітарызм ці собскі лукашызм? А можа і ніхто не вінаваты, акрамя самой гісторыі, якая выштукавала нам менавіта такую "гаротную" долю?

Пра гэта пойдзе гаворка на наступнай публічнай лекцыі цыкла "Гораду і Свету", які Лятучы ўніверсітэт ладзіць у Магілёве пры падтрымцы Міжнароднага кансорцыюма "ЕўраБеларусь". Да магілёўскай аўдыторыі прамовіць філосаф, літаратар Валянцін Акудовіч. Лектар збіраецца радыкальна пераасэнсаваць "адраджэнскі" нацыянальны канон як бесперспектыўны і нават заганны ў рэальных умовах сучаснай Беларусі. І прапанаваць сваю візію "Беларускага праекта".

У чым сутва ягонай прапановы? Пра гэта даведаемся падчас публічнай лекцыі "Беларускі праект: змена нацыянальнай парадыгмы" - 21 снежня 2013 года ў магілёўскім "Тэхнапарку" (вул. Ленінская, 63, ауд. 807). Пачатак у 15.00. Уваход вольны!