"Urbi et Orbi" у Магілёве: Мікалай Лявонаў

Сучасная навука, сучасныя веды, як правіла, маюць прадметную структуру. Пры гэтым кожны з прадметаў развівае свае спецыфічныя метады, у кожным з іх робяцца свае адкрыцці, дасягненні - можна сказаць, што кожны з іх па-свойму важны. У той жа момант, некаторыя прадметы прэтэндуюць на выключны статус. У іх шэрагу і матэматыка, якую К.Ф. Гаус называў каралевай ўсіх навук. Што стаіць за гэтымі прэтэнзіямі матэматыкаў? Прадметны снабізм навукоўцаў, глыбока ангажаваных у прадмеце, якія ўзвышаюць свой пункт гледжання, або рэальнае напаўненне і сур’ёзныя падставы?

Матэматык, кандыдат фізіка-матэматычных навук Мікалай Мікалаевіч Лявонаў, лектар наступнай публічнай лекцыіў магілеўскім цыкле “Гораду і Свету” сцвярджае, што матэматыка патрэбна не толькі для таго, каб падлічыць рэшту ў касе і перакласці даляры па актуальным курсе. Матэматыка - гэта, перад усім, логіка і ўпарадкаванасць. Набор правіл і функцый, якія робяць мысленне паслядоўным і лагічным. Таму, выкарыстоўваючы нават вельмі простую матэматыку, можна істотна падвысіць якасць разважанняў, прыйсці да больш дакладных высноў і нават не зрабіцца ахвярай маніпуляцыі. Наколькі валодаем мы гэтым інструмантам мыслення? Наколькі ўмеем карыстацца матэматыкай як формай мыслення? Лектар запрашае убачыць матэматыку “ў дзеянні” - ад першапачатковых уменняў карыстацца матэматычнай мовай да больш сур’езных паняццяў, якія, аказваецца, насамрэч не такія ўжо і складаныя.

Лекцыя Мікалая Лявонава “Матэтамыка як форма мыслення” адбудзецца 23 лістапада 2013 года ў магілёўскім “Тэхнапарку” (вул. Ленінская, 63), зала 807. Уваход вольны!

24 лістапада для жадаючых адбудзецца паслялекцыйная сустрэча, на якой больш дэтальна будуць абмяркоўвацца важныя моманты публічнага выступу. Час і месца можна ўдакладніць на суботняй лекцыі ў мадэратара.

Запрашаем да прагляду відэаанонса курса “Матэматычная “мова” мыслення”, які Мікалай Лявонаў плануе прачытаць у 2013-2014 навучальным годзе ў межах базавых адукацыйных курсаў Лятучага ўніверсітэта.